მოქალაქეებს ჯარიმა-საურავის სახით გადახდილი 10 ლარზე მეტი უკან დაუბრუნდებათ. ამის შესახებ იურიდიულ საკითხთა კომიტეტის სხდომაზე საპარლამენტო უმრავლესობის წევრმა გიგლა აგულაშვილმა "ადმინისტრაციული სახდელისაგან გათავისუფლების შესახებ" კანონპროექტის განხილვისას განაცხადა. მისივე თქმით, 2012 წლის 1-ელ ოქტომბრამდე "მოქალაქეთა პოლიტიკური გაერთიანებების" შესახებ კანონით გათვალისწინებულ სამართალდარღვევაზე საჯარიმო თანხა 144 მილიონ ლარზე მეტს შეადგენს, თუმცა 10 მილიონზე მეტი უკვე აღსრულებულია. გიგლა აგულაშვილის განცხადებით, სახელმწიფოს შეძლებისდაგვარად მოუწევს, ფულადი თანხის უკან დაბრუნება, აღუსრულებელ ნაწილში კი მოქალაქეები ჯარიმას აღარ გადაიხდიან. კომიტეტის სხდომაზე კანონპროექტის სესიაზე პირველი მოსმენით გატანას მხარი დაუჭირეს. "მოქალაქეთა პოლიტიკური გაერთიანებების შესახებ" კანონის საფუძველზე წინასაარჩევნო პერიოდში დაჯარიმებული ფიზიკური თუ იურიდიული პირები დაკისრებული ადმინისტრაციული სახდელებისგან გათავისუფლდებიან. სახდელისაგან გათავისუფლება როგორც აღუსრულებელ, ასევე აღსრულებულ ნაწილსაც ეხება, რაც იმას ნიშნავს, რომ პირებს, რომელთა მიმართ ფინანსური სანქციები უკვე გამოიყენეს, ჯარიმა-საურავის სახით გადახდილი თანხები ბიუჯეტიდან უკან დაუბრუნდებათ. ასევე უქმდება მათ მიმართ გახორციელებული ყველა იძულებითი სახის ღონისძიება: ყადაღა, ინკასო და ასე შემდეგ. 2012 წლის 1-ელ ოქტომბრამდე "მოქალაქეთა პოლიტიკური გაერთიანებების" შესახებ კანონით გათვალისწინებულ სამართალდარღვევაზე საჯარიმო თანხა 144 316 688 ლარს შეადგენს. აღნიშნული თანხიდან აღსრულების პროცესშია საქმეები 133 790 769 ლარზე. შესაბამისად, წარმოდგენილი კანონის მიღების საფუძველზე სახელმწიფოს ახალი ფინანსური ვალდებულება უჩნდება და მან ფიზიკურ და იურიდიულ პირებს ბიუჯეტიდან უკან ჯარიმა-საურავის სახით გადახდილი 10 525 919 ლარი უნდა დაუბრუნოს. "ადმინისტრაციული სახდელისაგან გათავისუფელბის შესახებ" კანონპროექტის ავტორები არიან საპარლამენტო უმრავლესობის წარმომადგენლები ზაქარია ქუცნაშვილი, ირაკლი ჩიქოვანი, გიგლა აგულაშვილი, ასევე, "ნაციონალი" დეპუტატი ჩიორა თაქთაქიშვილი.