ინგრედიენტების მარაგის ამოწურვის გამო ”დანკინ დონატსის” დონატები 2 დღით აღარ გაიყიდება, ამის შესახებ ”ვისოლ ჯგუფის” პრეზიდენტმა განაცხადა. "დონატებზე ძალიან დიდი მოთხოვნის გამო რამოდენიმე სპეციფიური, უნიკალური ინგრედიენტის მარაგი ძალიან სწრაფად ამოვწურეთ. მარაგების შევსება კი ჩვენს რეგიონში არსებული წყაროებიდან ვერ მოხერხდება. თუმცაღა, ჩვენი ამერიკელი პარტნიორების დახმარებით აშშ–­დან საჰაერო გადაზიდვის გზით უკვე გამოიგზავნა საჭირო პროდუქტები. ამას გარდა, რამოდენიმე დღის წინ სხვა სახის, ასევე აუცილებელი მარაგები სატვირთო მანქანებით გამოგზავნილ იქნა გერმანიიდან,"– აცხადებს სოსო ფხაკაძე. "დანკინ დონატსის" პირველი 2 რესტორანი თბილისში 13 იანვარს გაიხსნა. „ვისოლ ჯგუფმა“ ამერიკული რესტორნების უმსხვილეს ქსელთან, “დანკინ დონატსთან” ფრანჩაიზინგის ექსკლუზიურ ხელშეკრულებას ხელი 2014 წელს მოაწერა და კომპანიის განცხადებით, მომავალი რამდენიმე წლის განმავლობაში საქართველოში 35 „დანკინ დონატსის“ რესტორანს გახსნის.