ჟერარ დეპარდიემ, ჯერ კიდევ დეკემბრის შუა რიცხვებში განაცხადა: "პუტინმა მე უკვე პასპორტი გამომიგზავნა". ფრანგმა კინომსახიობმა, ჟერარ დეპარდიემ რუს ჟურნალისტებს დაუდასტურა, რომ მართლაც მიმართა რუსეთის ხელისუფლებას მოქალაქეობის მიღების თხოვნით. ამასთან საფრანგეთის მედია იტყობინება, რომ სამშაბათს დეპარდიემ საფრანგეთის პრეზიდენტს ფრანსუა ოლანდს დაურეკა და მათ შორის სატელეფონო საუბარი შედგა. რუსი ჟურნალისტებისთვის მიწერილ მიმართვაში, რომელიც რუსეთის პირველმა არხმა გააჟღერა  ნათქვამია: "დიახ, მე გავაკეთე მიმართვა პასპორტის მისაღებად და მიხარია, რომ ჩემი მიმართვა მიღებულ იქნა. მე თაყვანს ვცემ თქვენს კულტურას. მამაჩემი ერთ დროს კომუნსტი იყო და მოსკოვის რადიოს უსმენდა! ესეც ჩემი კულტურის ნაწილია". მსახიობს მოქალაქეობა რუსეთის ფედერაციის კონსტიტუციის 89 მუხლის შესაბამისი პუნქტით მიენიჭა, რომლის თანახმად, პრეზიდენტი რუსეთის მოქალაქეობისა და პოლიტიკური თავშესაფრის მინიჭების საკითხებს წყვეტს. დეპარდიე საფრანგეთიდან ბელგიაში საცხოვრებლად დეკემბრის დასაწყისში  გადავიდა. მიზეზად გადასახადების 75%-ით გაზრდა დაასახელა, რომლის დაწესებასაც საფრანგეთის პრეზიდენტი ფრანსუა ოლანდი გეგმავს. მალევე მან განაცხადა, რომ საფრანგეთის მოქალაქეობაზე უარს იტყოდა. 18 დეკემბერს ფრანგულმა გამოცემამ დაწერა, რომ დეპარდიემ შესაძლოა, რუსეთის მოქალაქეობა მიიღოს და მსახიობის განცხადება გაავრცელა, თუმცა მაშინ რუსეთის პრეზიდენტის ადმინისტრაციაში აღნიშნულ განცხადებას ხუმრობა უწოდეს. 20 დეკემბერს გამართულ პრესკონფერენციაზე კი პუტინმა განაცხადა, რომ მზადაა, დეპარდიეს მოქალაქეობა მიანიჭოს.