საქართველოს ზოგად საგანმანათლებლო სკოლებში 2012-2013 სასწავლო წელს სკოლის გამოსაშვები გამოცდები 4+4 მოდელით, ორ ეტაპად ჩატარდება. პირველი ეტაპი 2013 წლის 15 თებერვლიდან 1 მარტის ჩათვლით გაიმართება, მეორე ეტაპი - 2013 წლის 20 მაისიდან 29 მაისის ჩათვლით. კონკრეტულ საგანში გამოცდის ფორმის არჩევის და საგამოცდო განრიგის საკითხების შესახებ გადაწყვეტილებას თავად სკოლა იღებს. გამოცდის ჩაბარების უფლება ზოგად საგანმანათლებლო დაწესებულების დამამთავრებელი კლასის მოსწავლეებს და იმ პირებს აქვთ, რომლებმაც სრული ზოგადი განათლების საშუალო საფეხურის დაძლევის მიუხედავად, შესაბამის წელს სრული ზოგადი განათლების დამადასტურებელი დოკუმენტი ვერ მოიპოვეს. ზუგდიდის რესურსცენტრის ხელმძღვანელი ლელა ქებურია რადიო „ათინათთან“ საუბარში აცხადებს, რომ მეთორმეტე კლასელები 2013 –2014 წლებში იმავე 8 გამოცდას ჩააბარებენ, რომელსაც გასულ წელს აბარებდნენ. განათლების სამინისტრომ მოსწავლეებს შესთავაზა სერვისი, რომელიც ითვალისწინებს, რომ მეთერთმეთე კლასის დასრულებისას  მათ გამოცდის ჩაბარება 4 საგანში მოუწევთ.“ აღნიშნული გამოცდები გათვალისწინებულია საბუნებისმეტყველო საგნებში: ქიმიაში, ფიზიკაში, ბიოლოგიასა და გეოგრაფიაში. დარჩენილი გამოცდების ჩაბარება კი წლის ბოლოს მოუწევთ. სიახლეებია ეროვნული გამოცდების რეგისტაციის პროცესებთან დაკავშირებითაც. აბიტურიენტები თავიანთი არჩევანის  ჩამონათვალში არ იზღუდებიან. გასული წლებისგან განსხვავებით ისინი პირველ ეტაპზე მხოლოდ იმ გამოცდების ჩამონათვალში რეგისტრირდებიან, რომლის ჩაბარებაც სურთ. მითითებული პროფესიის შეცვლა კი მათ გამოცდების ჩაბარების შემდეგაც შეეძლებათ.