"C ჰეპატიტის ანტივირუსული მკურნალობის პროექტს ხელი 21 აპრილს მოწერება და უახლოესი დღეების განმავლობაში დაიწყება",-ამის შესახებ ჯანდაცვის მინისტრმა დავით სერგეენკომ გამართულ პრესკონფერენციაზე განაცხადა. "გაცნობებთ, რომ 21 აპრილს ხელი მოეწერება ხელშეკრულებას და ხელმოწერიდან უახლოესი დღეების განმავლობაში უკვე პირველი 5 000 ადამიანის სამკურნალო დოზა უკვე შემოვა. რაც შეეხება კონკრეტულ მონაცემებს, ამის შესახებ ხელმოწერის დღეს გაცნობებთ - ვგულისხმობ მიწვდომადობას ამ მედიკამენტებთან. კიდევ ერთხელ გაცნობებთ, რომ ეს იქნება ბევრად უფრო მიწვდომადი, ვიდრე ეგვიპტის პრეცედენტი",-განაცხადა სერგეენკომ. მინისტრმა პაციენტებს მოუწოდა, მკურნალობის დაწყებამდე, დაიცვან წესები და არ მოიხმარონ ალკოჰოლი. "ის პაციენტები, ვინც დაიწყებენ მკურნალობას, ძალიან კარგად უნდა აცნობიერებდნენ, რომ მკურნალობა არ ნიშნავს, რომ ღვიძლის ფუნქცია სრულად და მყისიერად დაუბრუნდება თავის საწყის მდგომარეობას, ეს არის ინფექციის მოსპობა და არა საკუთრივ ღვიძლის ფუნქციის გაუმჯობესება. ძალიან ხშირია შემთხვევა, როდესაც პაციენტებმა გაიგეს რა ამ მოსალოდნელი პროექტის შესახებ იმ რეჟიმს თავი დაანებეს, თავის მოვლას, ხშირია შემთხვევა, როდესაც ადამიანები ფიქრობენ, რომ მალე დაიწყებენ მკურნალობას და საერთოდ ხელი აიღეს რეჟიმის დაცვაზე, ღებულობენ ალკოჰოლს, არ იცავენ საბაზო პრინციპებს. კატეგორიულად მიუღებელია და ასეთი დამოკიდებულება ამ დაავადებისადმი არის ფატალური შედეგების მომტანი",-აღნიშნა სერგეენკომ.