დღეს მსოფლიოში უმსხვილესი სოციალური ქსელის „ფეისბუქის“ დაბადების დღეა. 2004 წელს, მარკ ცუკერბერგმა, რომელიც მაშინ ჰარვარდში სწავლობდა, პირველად ჩაუშვა ქსელი დომენზე thefacebook.com. ქსელის სახელწოდება კი აღებულ იქნა სტუდენტთა და მასწავლებელთა საკონტაქტო ცნობარიდან, რომელსაც უნივერსიტეტში The Facebook–ს უწოდებდნენ. The Facebook–ის ჩაშვებიდან სულ რაღაც 6 დღეში ჰარვარდის სამმა უფროსკურსელმა მარკი იმაში დაადანაშაულა, რომ The Facebook–ის იდეა მათ მოპარა. საქმე სასამართლომდეც კი მივიდა. ცუკერბერგის საიტზე მხოლოდ თებერვალში ჰარვარდის სტუდენტთა ნახევარი დარეგისტრირდა. მარტში The Facebook–ი სტენფორდამდე, კოლუმბიისა და იელის უნივერსიტეტებამდე გაფართოვდა. შემდეგ კი სხვა უნივერსიტეტებშიც გაიხსნა. მალე ის ხელმისაწვდომი გახდა კანადისა და აშშ–ის უნივერსიტეტების უმრავლესობაში. თანდათანობით შეიკრიბა გუნდი: ედუარდო სავერინი (ფინანსური დირექტორი), დასტინ მოსკოვიცი (პროგრამისტი,) ენდრიუ მაკ–კოლუმი (მხატვარი) და კრის ჰიუზი. 2004 წლის ივნისში The Facebook–ი გადავიდა პალო–ალტოში (კალიფორნია), ცუკერბერგმა და სავერინმა კი სოციალურ ქსელ Napster–ის დამფუძნებელი შონ პარკერი გაიცნეს, რომელმაც მალე კომპანია Facebook–ის პრეზიდენტის თანამდებობა მიიღო. 2005 წელს სოციალური ქსელის სახელწოდებიდან გაქრა არტიკლი the და კომპანიამ 200 ათას დოლარად მიიღო სახელი facebook.com. 2006 წლის 26 სექტემბერს სოციალური ქსელი ინტერნეტის ყველა იმ მომხმარებლისთვის გახდა ხელმისაწვდომი, რომელიც 13 წელზე უფროსია. ამის შემდეგ კი facebook–მა მთელი ქვეყნები და კონტინენტები დაიპყრო. კომპანიის ღირებულება მილიარდობით დოლარად განისაზღვრა. 2010 წლიდან მარკ ცუკერბერგი მსოფლიოს ერთ–ერთ ყველაზე ახალგაზრდა მილიარდერად მიიჩნევა. 2012 წელს Bloomberg–მა ცუკერბერგის ქონება 19,1 მილიარდ დოლარად შეაფასა. შეგახსენებთ, რომ ცუკერბერგი ამჟამად მხოლოდ 28 წლისაა.