საზოგადოების განწყობა საქართველოში - „ეროვნულ-დემოკრატიული ინსტიტუტის“ მიერ ჩატარებული მორიგი კვლევის შედეგები, რომელიც მიმდინარე წლის აპრილშია ჩატარებული დღეს ხდება ცნობილი. NDI-ს კვლევის მიხედვით, ყველაზე მნიშვნელოვან ეროვნული საკითხების პირველ სამეულში სამუშაო ადგილები, ფასების ზრდა და სიღარიბე შედის. შეკითხვაზე, რომელია ყველაზე მნიშვნელოვანი ეროვნული საკითხები, სამუშაო ადგილები გამოკითხულთა 66%-მა დაასახელა, ფასების ზრდა/ინფლაცია 43%-მა, სიღარიბე კი - 39%-მა. ეროვნულ საკითხებში შემდეგი ადგილები უჭირავს 27%- ტერიტორიულ მთლიანობას, 21% - პენსიებს, 17%- ხელფასებს, ასევე 17% - ხელმისაწვდომ ჯანდაცვას, 12% - რუსეთთან ურთიერთობას, 10% - განათლებას და ა.შ. NDI-ს საქართველოს ოფისის დირექტორის თქმით, პირველი შემთხვევაა, როდესაც ტერიტორიული მთლიანობა ეროვნული საკითხების ჩამონათვალში პირველ სამეულში არ მოხვდა. "ეს არ ნიშნავს, რომ ტერიტორიული მთლიანობა მოსახლეობისთვის აღარ არის მნიშვნელოვანი, უბრალოდ ის სხვა საკითხებმა გადაფარა", - განაცახადა NDI-ს დირექტორმა. კვლევის ფარგლებში, საქართველოს მასშტაბით 4 ათას 360 რესპონდენტი გამოიკითხა.