ვერეს ხეობაში „ქართული მანჰეტენი“ მოწყობა, შესაბამის პროექტი საერთაშორისო მშენებელთა ასოციაციამ და საქართველოს ბიზნესპალატამ შეიმუშავა. საკითხთან დაკავშირებით დარგის სპეციალისტები ამ წუთებში „თბილისი მარიოტში“ მსჯელობენ. ბიზნესპალატის ხელმძღვანელი ემზარ ჯგერენაია აცხადებს, რომ მდინარე ვერემ „ნგრევა დაამთავრა და ახლა უნდა დაიწყოს მშენებლობა“. პროექტთან დაკავშირებით მოწვეულები არიან უცხოელი სპეციალისტები და დაწყებულია კვლევა ვერეს ხეობის პრობლემებთან დაკავშირებით. „პროექტის არსი იმაშია, რომ პატარა, ლამაზი მანჰეტენი შევქმნათ თბილისში, თავისი რეკრეაციული ზონით, დამბით, წყლის ნაპირსამაგრი სამუშაოების ჩატარებით", - ამბობს ჯგერენაია. მისივე ინფორმაციით, როგორც სპეციალისტები ამბობენ, დამბის აშენების შემთხვევაში აბსოლუტურად შესაძლებელია ამ პროექტის განხორციელება. "დამბა იქნება იმის გარანტორი, რომ მსგავსი არასდროს განმეორდება თბილისში. პროექტი "მანჰეტენი" გულისხმობს სარეკრეაციო ზონის აღდგენას, პარკის გაშენებას თავისი სპორტული მოედნებით, სასტუმროებით, ბიზნესცენტრებით და კორპუსების განთავსებას", - განაცხადა ჯგერენაიამ. ბიზნესპალატის ხელმძღვანელის თქმით, მთავრობას „სიგნალი უკვე მისცეს“ და რამდენიმე მინისტრს ელაპარაკნენ. პროექტის განხორციელებას დასჭირდება 1 400 000 000 და ამ თანხის მოძიებას დონორებისა და ინვესტორებისგან შეეცდებიან.