საქართველოს სახალხო დამცველის უჩა ნანუაშვილის განცხადებით,  ევროპის ახალგაზრდული ოლიმპიური ფესტივალის გახსნაზე სპეციალური საჭიროებების მქონე ადამიანების ინტერესები არ გაუთვალისწინებიათ. უმბუდსმენი მიიჩნევს, რომ  საქართველოში სპეციალური საჭიროებების მქონე პირთა განსაკუთრებული საჭიროებების იგნორირების ფაქტები სპორტულ, კულტურულ და გასართობ ღონისძიებებში სამწუხარო პრაქტიკად იქცა. "არაადაპტირებული გარემო და პირობები ხშირად ხდება ამ პირთა დისკრიმინაციის საფუძველი", - წერია სახალხო დამცველის დღეს გავრცელებულ განცხადებაში. ომბუდსმენი გამოეხმაურა "რუსთავი 2-ის მიერ გავრცელებულ ინფორმაციას, რომლის თანახმად 2015 წლის 26 ივლისს ევროპის ოლიმპიური ახალგაზრდული ფესტივალი „თბილისი 2015“–ის ორგანიზატორებმა ღონისძიების გახსნის ცერემონიაზე დასწრების მსურველ სსმ პირთა საჭიროებები არ გაითვალისწინეს. მედიის ინფორმაციით, მიხეილ მესხის სახელობის სტადიონზე თავისუფლად შესვლის, გადაადგილებისა და ღონისძიებაზე დასწრების პროცესში, ეტლით მოსარგებლე ადამიანებს დაბრკოლება შეექმნათ. ომბუსდმენმა გასულ კვირას რეკომენდაციით მიმართა ღონისძიების ორგანიზატორს – შეიმუშავოს შიდა დოკუმენტი (დებულება/წესები/პრინციპები), რომლითაც გათვალისწინებული იქნება სხვადასხვა ღონისძიების ჩატარების დროს სპეციალური საჭიროებების მქონე პირებისთვის მასში ღირსეულად მონაწილეობის ხელშეწყობის პრინციპები. ამასთან, საქართველოს სახალხო დამცველი მოუწოდებს ყველა საჯარო თუ კერძო დაწესებულებას, გაითვალისწინოს „შეზღუდული შესაძლებლობის მქონე პირთა უფლებების შესახებ“ გაეროს კონვენციით და საქართველოს კანონმდებლობით დადგენილი მოთხოვნები, – სპეციალური საჭიროებების მქონე პირთა დამოუკიდებელი ცხოვრებისა და ცხოვრების ყველა სფეროში მათი სრულყოფილი მონაწილეობისათვის უზრუნველყოს ფიზიკური გარემოს, საზოგადოებისათვის ღია ობიექტებისა და მომსახურების თანაბარი მისაწვდომობა, დისკრიმინაციის გარეშე.