სახალხო დამცველმა საქართველოს მთავრობას შეზღუდული შესაძლებლობების მქონე პირთათვის დამოუკიდებელი ცხოვრების ხელშეწყობის მიზნით რეკომენდაციით მიმართა. ომბუცმენის აპარატის ცნობით "საქართველოს სახალხო დამცველის შესახებ" საქართველოს ორგანული კანონის 21–ე მუხლის თანახმად, საქართველოს სახალხო დამცველმა რეკომენდაციით მიმართა საქართველოს მთავრობას, უზრუნველყოს შესაბამისი საკანონმდებლო და ადმინისტრაციული რეგულაციების რევიზია, დახვეწა და განახლება, რათა შეზღუდული შესაძლებლობის მქონე პირთა დამოუკიდებელი ცხოვრების ყველა სფეროში მიღებულ იქნას შესაბამისი ზომები მათთვის ფიზიკური გარემოს, ტრანსპორტის, ინფორმაციისა და კომუნიკაციის, მათ შორის ინფორმაციისა და საკომუნიკაციო ტექნოლოგიებისა და სისტემების, ასევე სხვა საზოგადოებისათვის ღია ობიექტებისა და მომსახურების თანაბარი მისაწვდომობა როგორც ქალაქის, ასევე სოფლის პირობებში. ამასთან შესაბამისი ორგანოების მიერ მოხდეს სხვადასხვა ნორმატიული აქტით დაწესებული რეგულაციების განხორციელების მონიტორინგი და დაწესებული სანქციების ამოქმედება. "საქართველოში შეზღუდული შესაძლებლობის მქონე პირთა უფლებების დაცვის ხელშეწყობისა და აღნიშნული უფლებების შესახებ საზოგადოების ცნობიერების ამაღლების მიზნით 2013 წელი საქართველოში გამოცხადებულია შეზღუდული შესაძლებლობის მქონე პირთა უფლებების დაცვის წლად. საქართველოს სახალხო დამცველი სრულად იზიარებს იმ მოსაზრებას, რომლის თანახმად, შეზღუდული შესაძლებლობის მქონე პირთა სოციალური ინტეგრაცია აღნიშნულ პირებისათვის თანაბარი შესაძლებლობების უზრუნველყოფის გზით უნდა იქნას მიღწეული. ამ მხრივ, მნიშვნელოვანია სოციალური ინფრასტრუქტურით შეზღუდული შესაძლებლობის მქონე პირთა შეუფერხებელი სარგებლობისათვის პირობების შექმნა, არსებული ბარიერების აღმოფხვრა", - ნათქვამია სახალხო დამცველის განცხადებაში. ადგილობრივი და საერთაშორისო კანონმდებლობით, შეზღუდული შესაძლებლობის მქონე პირები უზრუნვეყოფილნი უნდა იყვნენ თანაბარი ხელმისაწვდომობით და მათთვის დადგენილი პირობების შექმნისგან თავის არიდება, ობიექტების დაპროექტებისას და მშენებლობისას აღნიშნულ პირთა საჭიროებებისა და მოთხოვნილებების გაუთვალისწინებლობა იწვევს ადმინისტრაციულ პასუხისმგებლობას. "საკითხის შესწავლამ ცხადყო, რომ მიუხედავად იმისა, რომ საქართველოს ადმინისტრაციულ სამართალდარვევათა კოდექსის მიხედვით განსაზღვრულია ადმინისტრაციული პასუხისმგებლობის განმსაზღვრელი ორგანო, სხვადასხვა ნორმატიული აქტით დაწესებულია შეზღუდული შესაძლებლობის მქონე პირთათვის შენობა-ნაგებობებისა და საზოგადოებრივი სივრცეების გამოყენების უზრუნველყოფის პირობები, საკითხი დღემდე არ არის სათანადოდ მოგვარებული. შედეგად შეზღუდული შესაძლებლობის მქონე პირები მუდმივად აწყდებიან სხვადასხვა სახის ბარიერებს", - ნათქვამია განცხადებაში.