ასოციაცია "ათინათი", სოციალური მომსახურების სააგენტოსა და ზუგდიდის მერიასთან თანამშრომლობით, პროექტის "LIFE Georgia" ფარგლებში დასაქმების ფორუმს გამართავს. შეხვედრა დღეს, 17 ივნისს 13.00- დან 17.00 საათამდე ქალაქ ზუგდიდში, რესტორან "მონოპოლის" დარბაზში (თამარ მეფის ქ.3) ჩატარდება.

ფორუმში მონაწილეობას მიიღებს 40-მდე ადგილობრივი კომპანია, რომელიც არსებულ ვაკანსიებზე მისთვის სასურველ კადრებს შეარჩევს. მასში მონაწილეობის მისაღებად კი worknet.gov.ge -ზე უკვე დარეგისტრირდა 600-ზე მეტი მსურველი.

ღონისძიებაში მონაწილეობას მიიღებენ სოციალური მომსახურების სააგენტოს დირექტორის მოადგილე კობა სონღულაშვილი, დასაქმების პროგრამების დეპარტამენტის უფროსი მარიამ ბეზარაშვილი და ადგილობრივი თვითმმართველობის წარმომადგენლები.

პროექტს - "საარსებო წყაროების მხარდაჭერა საქართველოში დევნილი და ადგილობრივი მოსახლეობის დასაქმებისა და მეწარმეობის ხელშეწყობის მიზნით- "LIFE Georgia" ევროკავშირის ფინანსური მხარდაჭერითა და ACF-ს (ფონდი "მოძრაობა შიმშილის წინააღმდეგ") ლიდერობით ორგანიზაციათა კონსორციუმი ახორციელებს. ეს ორგანიზაციებია: ფონდი "მოძრაობა შიმშილის წინააღმდეგ", ასოციაცია " ათინათი", და ასევე არასამთავრობო ორგანიზაციები "სამხარეო განვითარება მომავალი საქართველოსთვის", "განათლება დემოკრატიისთვის", "საზოგადოებრივი პროგრამების ფონდი" და "სამართლებრივი დახმარება საქართველო".

პროექტის მიზანია იძულებით გადაადგილებული და ადგილობრივი მოსახლეობის სიღარიბის დაძლევა. ის სამეგრელოში და შიდა ქართლში ხორციელდება.