დღეს, საქართველოს რეგიონული განვითარებისა და ინფრასტრუქტურის მინისტრი დავით ნარმანია რეგიონული მედიის წარმომადგენლებს შეხვდა. შეხვედრას, ესწრებოდნენ მინისტრის მოადგილეები - თენგიზ შერგელაშვილი და შოთა მურღულია, საავტომობილო გზების დეპარტამენტის თავმჯდომარის, მუნიციპალური განვითარების ფონდის დირექტორისა და გაერთიანებული წყალმომარაგების კომპანიის დირექტორის მოადგილეები. ასევე, მყარი ნარჩენების მართვის კომპანიის დირექტორი გიორგი შუხოშვილი. შეხვედრაზე წარმოდგენილი იქნება 2013 წლის პირველი კვარტლის ანგარიში, ასევე, რეგიონებში განსახორციელებელი პროექტების ფონდისა და სოფლის მხარდაჭერის პროგრამის ფარგლებში განსახორციელებელი პროექტები რეგიონების მიხედვით. „2013 წელს 180 მლნ ლარით მეტი ინფრასტრუქტურული პროექტები უნდა განხორციელდეს“– განაცხადა რეგიონალური განვითარების მინისტრმა დავით ნარმანიამ. რეგიონალური განვითარების სამინისტროს მიერ წარმოდგენილ დოკუმენტში ძირითადი პრიორიტეტები შემდეგნაირად ნაწილდება: გზების რეაბილიტაცია, წყალმომარაგება, ნაგავსაყრელი და მაღალსართულიანი საცხოვრებელი კორპუსების გადახურვა. სამეგრელო–ზემო სვანეთიდან 2013 წელს განსახორციელებლად სულ 103 პროექტია წარდგენილი აქედან, 27–გზების დაგება რეაბილიტაცია; 14 –ხიდების აღდგენა; 24 წყალგაყვანილობა და საკანალიზაციო მილების აღდგენა; 19– ნაპირსამაგრი სამუშაოები; 19 – სხვადასხვა, შერეული ინფრასტრუქტურული სამუშაოები. რადიო „ათინათის“ კითხვაზე შეიქმნება თუ არა სპეციალური კომისია, რომელიც სოფლის მხარდაჭერის პროექტით განხორციელებულ სამუშაოების ხარისხს მონიტორინგს გაუწევს? რეგიონალური განვითარებისა და ინფრასტრუქტურის სამსახურის მინისტრის, მოადგილემ თენგიზ შერგელაშვილმა განაცხადა რომ, მშენებლობის ხარისხზე მონიტორინგს უშუალოდ სამინისტრო განახორციელებს და დამატებით კომისია არ შეიქმნება. დაფინანსდება თუ არა ზუგდიდის ყინულის სახლი რეგიონალური განვითარების ფონდიდან? „ჩვენთვის მნიშვნელოვანია მსგავსი პროექტების განხორციელება და განვითარება, თუმცა ამ დროისთვის მიმდინარეობს დოკუმენტების მომზადება, მთავარია პროექტი ძველი გაანგარიშებით განხორციელდეს. ზუგდიდის გამგეობა როგორც კი წარმოადგენს ყველა საჭირო დოკუმენტს სადაც განისაზღვრება საჭირო თანხები, ჩვენი სამინისტრო შეეცდება რომ აღნიშნული პროექტი ნაწილობრივ დააფინანსოს",- განაცხადა რეგიონალური განვითარებისა და ინფრასტრუქტურის სამსახურის მინისტრის მოადგილე შოთა მურღულიამ. იგეგმება თუ არა თვითმმართველობის რეფორმასთან დაკავშირებით საგანმანათლებლო ღონისძიების ჩატარება და ამ პროცესში მოსახლეობა რამდენად იქნება ჩართული? „ამ კუთხით ძირითადი მიმართულება ადგილობრივ მედიასთან ურთიერთობა იქნება, ასევე გამოვიყენებთ ინფორმაციის გავრცელების სხვადასხვა საშუალებებს მოქალაქეების ინფორმირებისათვის. რაც შეეხება საგანმანათლებლო პროგრამას ამ კუთხით სამინისტროში არაფერი იგეგმება",-განაცხადა, მინისტრის, მოადგილე თენგიზ შერგელაშვილმა.