სოციალურ საკითხებზე მომუშავე მრჩეველთა საბჭოს შეხვედრაზე გამგეობისა და არასამთავრობო ორგანიზაციების წარმომადგენლებმა პროექტის შედეგები შეაჯამეს და სამოქმედო გეგმა დასახეს. სხდომაზე ასევე ახალ პროექტებზე ისაუბრეს, რომელთა მიღების ბოლო ვადა 23 იანვარია. შეხვედრის მონაწილეები იმედოვნებენ, რომ აღნიშნული პროექტები ხელს შეუწყობს მუნიციპალიტეტის სოციალური პრობლემების მოგვარებას.

მოხსენება წარმოადგინა ზუგდიდის მუნიციპალიტეტის გამგეობის სოციალური დაცვის განყოფილების ხელმძღვანელმა გოგი რევიამ, რომელმაც ადგილობრივი მუნიციპალიტეტის ბიუჯეტის სოციალური მიმართულების ახალ პრიორიტეტებზე ისაუბრა.

„პროექტები არის ყველა მიმართულებით. ეს არის მოხუცთა შინ მოვლის საკითხებზე, ახალგაზრდულ პროგრამებზე, შშმ პირებზე. დიდი სოციალური სპექტრია, სადაც შეუძლიათ წარმოადგინონ პროექტები და მიიღონ დაფინანსება პრობლემების მოსაგვარებლად“ - აღნიშნა რევიამ.

შეხვედრა „სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში“ ფარგლებში ჩატარდა, რომელსაც ჩეხური არაკომერციული ორგანიზაცია „ადამიანი გაჭირვებაში“ (PIN) ახორციელებს.

მრჩეველთა საბჭო დაკომპლექტებულია ადგილობრივი არასამთავრობო ორგანიზაციების წარმომადგენლებით და სამთავრობო, სოციალური სერვისის მიმწოდებელი გადაწყვეტილების მიმღები პირებით, რომლებიც თვეში ერთხელ იკრიბებიან.