ზუგდიდის მერიის წარმომადგენლებმა მოვაჭრეები გარევაჭრობის აკრძალვის შესახებ გააფრთხილეს. ზედამხედველობის სამსახურის თანამშრომლებმა ბაზრის გარეთ მოვაჭრეებს შესაბამისი დადგენილება გააცნეს და თვითნებურად დაკავებული ტერიტორიების დაცლისკენ მოუწოდეს. აღმასრულებელი ორგანო გარევაჭრობის აკრძალვასთან დაკავშირებით უახლოეს პერიოდში მასშტაბური ღონისძიებების გატარებას გეგმავს.

ბაზრის მიმდებარე ტერიტორიაზე გარემოვაჭრეების ნაწილი აღნიშნულ აკრძალვას ეწინააღმდეგება და ამბობს, რომ არსად გადასვლას არ აპირებს. ისინი ხელისუფლების მიერ შემოთავაზებულ ალტერნატიულ ფართზე უარს ამბობენ.

,, ალტერანტიულ ფართზე უარს ვამბობთ, რადგან ჩვენი საქონლით ბაზრობაზე რეალიზებულ პროდუქციას კონკურენციას ვერ გავუწევთ, შესაბამისად ფართის გადასახადს ვერ გადავიხდით,’’- აღნიშნა ერთ-ერთმა გარემოვაჭრემ.



კეიდიას ქუჩაზე განლაგებული მაღაზიის მეპატრონეები კი ამბობენ, რომ კანონს დაემორჩილებიან, მაღაზიის გარეთ განლაგებულ საქონელს შიგნით შეიტანენ და სავალ გზას გაანთავისუფლებენ.

დემოკრატიული ჩართულობის ცენტრში გარევაჭრობის რეგულირების წესთან დაკავშირებით, საჯარო შეხვედრა გაიმართა, ის საკრებულოს წევრების ინიციატივით მოეწყო. შეხვედრას გარემოვაჭრეების ნაწილი დაესწრო. ერთ-ერთი გარემოვაჭრე ამბობს, რომ აღნიშნულ შეხვედრაზე, მათ ვაჭრობისთვის ადგილის მოწყობას დაპირდნენ.

,,ყველაფერს გაგიკეთებთო და დაგეხმარებითო, კონსტრუქციების დამონტაჟებას დაგვპირდნენ სიტყვიერად, მაგრამ ახლა გვიკრძალავენ აქ დგომას, სხვაგან გადადითო.. ქალაქის ცენტრში ხომ არ ვართ, აგერ ვართ ჩხოუშიის პირას,’’- თქვა ერთ-ერთმა გარემოვაჭრემ.

თავისმხრივ მერიის ზედამხედველობის სამსახურის უფროსმა ნუკრი ესართიამ რადიო ,,ათინათთან’’ საუბრისას აღნიშნა, რომ მერია გარემოვაჭრეებს კონსტრუქციების აშენებას არ დაპირებია, მისივე თქმით, მერია მხოლოდ ალტერნატიულ ფართს სთავაზობდა მათ.




,,ჩვენი სამსახური არავის არაფერს არ დაპირებია, შეთავაზება იყო მხოლოდ ერთი- ალტერნატიული ფართი. ვინც დაპირდა იმათ დაუკავშირდით,‘- თქვა ესართიამ.

საკრებულოს ეკონომიკის, ურბანული განვითარებისა და ქონების მართვის საკითხთა კომისიის თავმჯდომარე თენგიზ ქოჩუა ამბობს, რომ საჯარო შეხვედრა მათი ორგანიზებით გაიმართა და მათი მიზანი იყო მერია და გარემოვაჭრეები შეთანხმებამდე მისულიყვნენ, რაც მისივე თქმით, საბოლოო ჯამში ვერ მოხერხდა.

,,ჩვენ ვთავაზობდით მერიას შუალედურ გადაწყვეტილებას, იმის შესახებ, რომ გარემოვაჭრეებისთვის დამონტაჟებულიყო კონსტრუქციები, თუმცა მერიამ მოულოდნელად საკრებულოს სხდომაზე აღნიშნული საკითხი გაიტანა და გარე ვაჭრობის რეგულირება დაამტკიცა,’’- განაცხადა ქოჩუამ.

საკრებულოს 2017 წლის 20 აპრილის №30 დადგენილების მიხედვით, გარე ვაჭრობა ქალაქის 15 ქუჩაზე აიკრძალება, თუმცა, ყვავილების, სუვენირების, წიგნებისა და ჟურნალ-გაზეთების გასაყიდად მოწყობილობების დადგმისთვის ნებართვა გაიცემა. მერიაში აცხადებენ, რომ რეგულაციის მიზანია ქალაქ ზუგდიდის იერსახის შენარჩუნება, საგზაო მოძრაობის უსაფრთხოების უზრუნველყოფა, ქალაქ ზუგდიდის მოსახლეობის ინტერესების დაცვა.