2013 წლის ერთიანი ეროვნული გამოცდებისთვის აბიტურიენტთა რეგისტრაცია დასრულებულია. წელს გამოცდებში 42 ათასამდე აბიტურიენტი მიიღებს მონაწილეობას. ზუგდიდის საგამოცდო ცენტრში  წელს 1687 აბიტურიენტს ელოდებიან, ამის შესახებ რადიო „ათინათს“ ზუგდიდის საგამოცდო ცენტრის ხელმძღვანელმა ნანა ქირიამ განუცხადა. ნანა ქირიას თქმით, საგამოცდო ცენტრი მზადაა მიიღოს აბიტურიენტები და მაგისტრანტები, რაც შეეხება გალის რაიონიდან გადმოსულ აბიტურიენტებს, მათი რაოდენობა ხვალ გახდება ცნობილი. ერთიანი ეროვნული გამოცდების ცენტრის ხელმძღვანელ მაია მიმინოშვილის თქმით, წელს, ბოლო წლებთან შედარებით, აბიტურიენტთა უპრეცედენტო რაოდენობა დაფიქსირდა. გამოცდების ეროვნული ცენტრის ინფორმაციით, წლევანდელი რეგისტრაციის მონაცემები ერთიანი ეროვნული გამოცდების არსებობის ისტორიაში რეკორდული მაჩვენებელია. 2012 წელს სტუდენტობა 36 000-მდე აბიტურიენტს სურდა, 2011 წელს კი რეგისტრაცია 33 000-ზე ოდნავ მეტმა ახალგაზრდამ გაიარა. აქამდე, „რეკორდსმენი“ 2008 წელი იყო, როდესაც გამოცდებისთვის 40 000-მდე აბიტურიენტი დარეგისტრირდა. რამ გამოიწვია ასეთი მაღალი მაჩვენებელი 2013 წელს, ამის შესახებ გამოცდების ეროვნულ ცენტრში ჯერჯერობით არ საუბრობენ.