“საერთაშორისო გამჭვირვალობა-საქართველომ“ ზუგდიდში თემაზე “ევროინტეგრაცია და ანტიდასავლური პროპაგანდა” დისკუსია გამართა, რომელსაც ორგანიზაციის აღმასრულებელი დირექტორის მოადგილე გიორგი ონიანი უძღვებოდა. დისკუსიაზე საქართველოს მიერ არჩეულ ევროპულ კურსზე და იმ ე.წ. მითებზე ისაუბრეს, რომელსაც რუსეთის ფედერაცია საქართველოში ანტიდასავლური პროპაგანდისთვის ავრცელებს.

შეხვედრაზე ყველა შეთანხმდა, რომ რუსეთი ოკუპანტია, თუმცა მონაწილეების ნაწილის თქმით, პუტინისა და რუსი ხალხის ერთმანეთთან გაიგივება არასწორია, რადგან მათი აზრით, ხალხი პოლიტიკის ნაწილი არ არის.

დისკუსიაზე კამათი ევროინტეგრაციის კონტექსტსში ერთსქესიანთა ქორწინებისა და ლგბტ თემის საკითხმა გამოიწვია. ბიბლიოთეკების მართვის ცენტრის ერთ-ერთი თანამშრომელმა ირინა კარტოზიამ ონიანს უთხრა, რომ ის ლგბტ თემის პროპაგანდას ეწეოდა, რის გამოც პროცესტის ნიშნად მან შეხვედრა დატოვა.

„რუსული ანტიდასავლური პროპაგანდა არაფერ შუაშია, ჩვენ ვსაუბრობდით იმაზე, რატომ არის ევროკავშირისგან ასეთი მოთხოვნა. რაც შეეხება რუსულ პოლიტიკასა და ინტეგრაციას, თავს შევიკავებ, რადგან აღელვებული ვარ“, - თქვა შეხვედრის დასრულების შემდეგ ირინა კარტოზიამ.

შეხვედრის მონაწილეების ნაწილი კი თვლის, რომ ეს რუსული პოლიტიკის ერთ-ერთი მითია, რაც ანტიდასავლურ პროპაგანდას ემსახურება.



„ის, რომ რუსეთი ერთმორწმუნე მოძმე ქვეყანაა და აქვს იმის უნარი, რომ საქართველო გახდეს პრორუსული სახელმწიფო, ნონსენსია და მითია, რადგან გეორგიევსკის ტრაქტატიდან დღემდე რუსეთს ჩვენთვის იოტისოდენა კარგიც კი არაფერი გაუკეთებია“, - აღნიშნა ერთ-ერთმა მონაწილემ დავით ლოგუამ.

თავად გიორგი ონიანმა ევროინტეგრაციის პროცესსა და რუსეთიდან მომავალ საფრთხეებზე გაამახვილა ყურადღება და აღნიშნა, რომ ე.წ. მითები დასავლეთის „გარყვნილობასთან“ თუ „არატრადიციულობასთან“ დაკავშირებით იმ პროპაგანდის ნაწილია, რომელმაც, შესაძლოა, პროცესი შეაფერხოს. მან დამსწრეებს სწორი აქცენტების დასმისა და ანალიზისკენ მოუწოდა.

რადიო „ათინათის“ კითხვაზე, ხედავს თუ არა რამე პროპგანდის საფრთხეს იმაში, რომ რუსეთში მოღვაწე ქართველი ბიზნესმენი ზუგდიდის სკოლის იუბილეს აწყობს, ონიანმა გვიპასუხა, რომ შესაძლოა, ღონისძიება პროპაგანდისტულ ნიშნებს შეიცავდეს.

„ყველაზე კარგად სამეგრელოში იციან, რომ ხუბუტია რუსეთის ხელმძღვანელობასთან სიახლოვითაა ცნობილი. შესაძლოა, შეხვედრა რუსეთის მიმართ დადებითი ემოციების გამოვლენის კუთხით გარკვეულ პროპაგანდისტულ ხასიათს ატარებდეს, თუმცა, დარწმუნებული ვარ, რომ ხალხი ბრძენია და ვერავინ, მით უფრო, ცალკეული ადამიანები ვერ გადარწმუნებს მათ იმაში, რომ რუსეთი ოკუპანტია და ცუდის მეტი საქართველოსთვის არაფერი მოუტანია“, - აღნიშნა ონიანმა.



ცნობისთვის, მიხეილ ხუბუტიას ფინანსური მხარდაჭერით ზუგდიდის პირველ საჯარო სკოლა იუბილეს 30 მაისს აღნიშნავს. ღონისძიებაში მონაწილეობას ქართველი მომღერლები მიიღებენ.

შეხვედრას, რომელიც ბიბლიოთეკების მართვის ცენტრში გაიმართა, მოქალაქეები, ბიბლიოთეკების მართვის ცენტრის თანამშრომლები და სტუდენტები დაესწრნენ.