განათლებისა და მეცნიერების მინისტრს, პრეზიდენტობის კანდიდატს გიორგი მარგველაშვილს განათლების მინისტრის პოსტზე მისი პირველი მოადგილე თამარ სანიკიძე შეცვლის. ამის შესახებ მარგველაშვილმა გუშინ ნოდარ დუმბაძის სახლ-მუზეუმში სტუმრობისას ჟურნალისტებს განუცხადა. გიორგი მარგველაშვილი თამარ სანიკიძეს მინისტრის თანამდებობაზე ოფიციალურად, სავარაუდოდ, დღეს წარადგენს. როგორც მარგველაშვილმა ჟურნალისტებს განუცხადა, ახალი კანდიდატურა პრემიერთან უკვე შეათანხმა. თამარ სანიკიძის თქმით, იგი საქმის კურსში იყო, რომ აღნიშნულ თანამდებობაზე მისი კანდიდატურა განიხილებოდა. ”გადაწყვეტილების მიღება უფრო დაჩქარებულად მოხდა, ვინაიდან მინისტრმა დროზე ადრე გადაწყვიტა პოსტის დატოვება. სამომავლო გეგმებიც გამომდინარეობს იმ სტრატეგიიდან და იმ ხედვიდან, რომელიც გვაქვს ამ სფეროსთან დაკავშირებით. იმ რეფორმებთან და სტრატეგიებთან დაკავშირებით, რომელსაც ვგეგმავდით, ნაწილი ცნობილია საზოგადოებისთვის, ნაწილი კი გასაშლელია, რასაც უახლოეს მომავალში მე გავაკეთებ და პირდაპირ მიზანმიმართულად დავიწყებთ სტრატეგიის განხორციელებას”,-აღნიშნა თამარ სანიკიძემ. თამარ სანიკიძე 2010-2012 წლებში საზოგადოებრივ საქმეთა ინსტიტუტში (GIPA), ფინანსური დირექტორის თანამდებობაზე მუშაობდა. განათლების მინისტრად გიორგი მარგველაშვილმა დამტკიცებისთანავე თამარ სანიკიძემ მისი პირველი მოადგილის თანამდებობა დაიკავა. შეგახსენებთ, რომ კოალიცია `ქართული ოცნების~ პრეზიდენტობის კანდიდატი გიორგი მარგველაშვილი განათლებისა და მეცნიერების მინისტრის თანამდებობას საარჩევნო კამპანიის დაწყების გამო ტოვებს.