შეზღუდული შესაძლებლობების მქონე პირთა პრობლემებისა და შეზღუდულობის სფეროში არსებული მდგომარეობისადმი საზოგადოების ყურადღების მიპყრობა, ასოციაცია „დეას“ მიერ დღეს დემოკრატიული ჩართულობის ცენტრში გამართული შეხვედრის ძირითადი მიზანი იყო. შეზღუდული შესაძლებლობების მქონე პირთა უფლებების დაცვის დღესთან დაკავშირებით გამართული შეხვედრა პროექტის: „საქართველოს ეტლების წარმოების ეროვნული ქსელი“ ფარგლებში გამართა. პროექტის ფინანსურ მხარდაჭერას „USAID“- უზრუნველყოფს, ტექნიკურ მხარდაჭერაზე მსოფლიო ინვალიდობის ინსტიტუტი “WID”, “WWI” და „OSCE“ ზრუნავენ. შეხვედრას სამეგრელო-ზემო სვანეთის სამხარეო ადმინისტარციის,ადგილობრივი მმართველობისა და თვითმმართველობის ორგანოების, ზუგდიდ-ცაიშის ეპარქიის,არასამთავრობო ორგანიზაციებისა და ფართო საზოგადოების წარმომადგენლები ესწრებოდნენ. შეხვედრაზე წარმოადგინეს მონიტორინგის შედეგები და სლაიდები სადაც ნაჩვენები იყო ის ბარიერები და შეზღუდვები, რომელსაც შეზღუდული შესაძლებლობის მქონე ადამიანები გარემოში აწყდებიან. დაასახელეს ის შენობები და საჯარო ორგანიზაციები სადაც მათ ეტლით შეღწევა უჭირთ. შეზღუდული შესაძლებლობების მქონე პირთათვის ბარიერებისგან თავისუფალი გარემოს შექმნაზე პროექტის კოორდინატორმა ივეტა წითაშვილმა ისაუბრა.“ ჩვენ წარმოვადგინეთ ის პრობლემები,რომელთა გადაწყვეტაში მონაწილეობის მიღება ადგილობრივი მუნიციპალიტეტის ხვედრითი წილია და მათ კომპეტენციაში შედის. ჩვენ გამოვთქვამთ იმედს, რომ ადგილობრივი ხელისუფლება მეტ ქმედით ნაბიჯს გადადგამს ცვლილებებისკენ,გარემოს ადაპტირებულობისკენ და ყველა მოქალაქისთვის თანაბარი უფლების შექმნის უზრუნველყოფის პროცესის მხარდასაჭერად.“-განაცხადა მან რადიო „ათინათთან“ საუბრისას. შეხვედრის შემდეგ მონაწილეებმა დემოკრატიული ჩართულობის ცენტრიდან ზუგდიდის მუნიციპალიტეტის გამგეობის შენობამდე სოლიდარობის აქცია-მსვლელობა გამართეს.