"საქართველოს პრეზიდენტი მიხეილ სააკაშვილი წასასვლელად ემზადება, პროექტები კი ფერხდება", - ამ სათაურით აქვეყნებს "ამერიკის ხმა" ჯეიმს ბრუკის სტატიას საქართველოზე. როგორც სტატიის ავტორი აღნიშნავს, ორი წლის წინ, როცა საქართველოს პრეზიდენტმა მიხეილ სააკაშვილმა ანაკლიაში სასტუმროები გახსნა, ეს საკურორტო ქალაქი შავი ზღვის მარგალიტი უნდა გამხდარიყო. "სანაპიროდან რამდენიმე კილომეტრში კი ლაზიკას მშენებლობა დაიწყო, ახალი ამბიციური ქალაქის, რომელიც ნახევარი მილიონი ადამიანის საცხოვრებელი უნდა გამხდარიყო. ანაკლიაში ერთ-ერთი ტურისას კი სააკაშვილმა ჟურნალისტებს განგვიცხადა, რომ ისე უყვარდა შავი ზღვის კურორტი, რომ სიკვდილის შემდეგ მისი ფერფლის აქ მიმობნევა სურდა", - წერს ჯეიმს ბრუკი და დასძენს, რომ საქართველოში პოლიტიკური ძალაუფლების შეცვლის შემდეგ პრეზიდენტის საყვარელი პროექტი სტაგნაციას განიცდის. როგორც სტატიის ავტორი აღნიშნავს, ანაკლიის დაგეგმილი იახტების ნავსადგურები შლამით დაიფარა, ტურისტების სამეთვალყურეო კოშკები არ გაიხსნა, სარეველათია სავსე ადგილი, რომელიც ხელისუფლების მიერ დაფინანსებული კვერცხის ფორმის სასტუმრო უნდა ყოფილიყო. მისივე თქმით, დახურულია "აკვა პარკი", რომელიც ორი წლის წინ პრეზიდენტმა სააკაშვილმა გახსნა. გასული წლის ოქტომბერში პრეზიდენტი სააკაშვილი არჩევნებში დამარცხდა. ამ წლის ოქტომბერში კი ხელისუფლებაში ყოფნიდან თითქმის ათი წლის შემდეგ თანამდებობას დატოვებს. საქართველოს ახალი პოლიტიკური ლიდერი, პრემიერ-მინისტრი ბიძინა ივანიშვილი კი პრაგმატული ბიზნმესმენია", - წერს ჯეიმს ბრუკი და ბიძინა ივანიშვილის კომენტარს ციტირებს, რომელმაც განაცხადა, რომ ახლანდელი ხელისუფლების პრიორიტეტი ამ სექტორებისა და საზღვრისპირა რეგიონების განვითარებაა, მაგრამ ეს არ უნდა მოხდეს ზედმეტი თანხების ხარჯვისა და უგუნურად დაგეგმვით. პრემიერისვე თქმით, საქართველო პროფესიონალურად უნდა განვითარდეს და არა მხოლოდ ერთი კაცის თვალსაზრისით. სტატიის ავტორი ასევე აღნიშნავს, რომ ანაკლიაში პრეზიდენტის კიდევ ერთი ოცნება – პორტის მშენებლობა შეჩერდა. იხილეთ ვიდეო: "სააკაშვილი მიდის, დაწყებული პროექტები ფერხდება" - "ამერიკის ხმა" საქართველოდან