2013 წლის 25 აგვისტოს, სასჯელაღსრულების #6 დაწესებულებაში პატიმარი გელა ჯაყელი გარდაცვლილი იპოვეს. პირველადი ინფორმაციით, მსჯავრდებული, რომელმაც  წარსულში არაერთხელ მიმართა თვითდაზიანებას, საკანში, მექანიკური ასფიქსიით გარდაცვლილი იპოვეს. 2013 წლის იანვრის შემდეგ, მსჯავრდებული გელა ჯაყელი თვითდაზიანებების გამო, 5-ჯერ გადაყვანეს სამოქალაქო საავადმყოფოებში, სადაც მას დროული და ადეკვატური დახმარება აღმოუჩინეს. მსჯავრდებულს არაერთხელ გაეწია ფსიქიატრის კონსულტაცია, რის საფუძველზეც სათანადო მკურნალობა ჩაუტარდა. მასთან მუშაობდა ფსიქოლოგიც. განსხავებულ ინფრომაციას ფლობენ გარდაცვლილის ოჯახის წევრები, გარდაცვლილის დედა აცხადებს, რომ მის შვილს ფსიქოლოგიური პრობლემები არ ჰქონია და იგი მოკლულია. "პარასკევს ციხეში ვიყავი ჩემი შვილის სანახავად, ციხის ადმინისტრაცია ჩემი თვალის ასახვევად კარგად ექცეოდა, თუმცა გელამ მითხრა, რომ მის მოკვლას აპირებდა ვინმე ზურა, გვარი არ ვიცი, მითხრა, რომ ის არის ციხის უფროსის მოადგილის დროებითი შემსრულებელი," – განაცხადა ზოია ჯაყელმა. გარდაცვლილის დედის ინფორმაციით, ციხეში მისმა შვილმა მართლაც მიიყენა თვითდაზიანება, იმიტომ, რომ გადასხმის გაკეთება მოითხოვა, ციხის ადმინისტრაციაში კი უარი უთხრეს. "გარდაცვლილს საფეთქელზე აქვს ზონარი შემოჭერილი და თავზე აქვს დაზიანებები. ამას თვითონ ვერ მიიყენებდა, ჩემი შვილი მოკლულია," – აღნიშნა ზოია ჯაყელმა. სასჯელაღსრულების, პრობაციის და იურიდიული დახმარების საკითხთა  სამინისტრო სამძიმარს უცხადებს გარდაცვლილის ოჯახს და ახლობლებს.  განცხადება მსჯავრდებულის გარდაცვალების შესახებ სამინისტრომ 25 აგვისტოს გაავრცელა. გარდაცვლილი კი საკუთარ ოჯახში, ბოლნისის რაიონის დაბა კაზრეთში დღეს დილით მიასვენეს.