ასოციაცია „ათინათის“ სააქტო დარბაზში დღეს, 7 სექტემბერს ონარიის დასახლების სოციალურ-ეკონომიკური და ინფრასტრუქტრული მდგომარეობის ანალიზის პრეზენტაცია გაიმართა. კვლელვა ასოციაცია „ათინათის“, „სამოქალაქო მონიტორინგისა და კვლევების ცენტრის“ და „საერთაშორისო გამჭვირვალობა-საქართველოს“ ზუგდიდის ოფისის კოალიციური პროექტის, „საზოგადოების ჩართულობა დემოკრატიული თვითმმართველობისათვის“ ფარგლებში მომზადდა. შეხვედარას, არასამთავრობო ორგანიზაციის და მედიის წარმომადგენლებთან ერთად, ონარიის მოსახლეობის ნაწილიც დაესწრო. კვლევის თანახმად, ზუგდიდის მუნიციპალიტეტის სოფელ ჭითაწყარში, კერძოდ ონარიის დასახლებაში, ამორტიზირებულია საცხოვრებელი კორპუსები, მოშლილია სახურავი, მოუწესრიგებელია კანალიზაცია და დაბინძურებულია ჭები, რის გამოც სხვადასხვა ვირუსული დაავადებების შემთხვევები ხშირია. ონარიაში დაახლოებით 350 ადამიანი ცხოვრობს. მუდმივად მცხოვრებ 109 ოჯახს შორის 47 იძულებით გადაადგილებულ პირთა ოჯახებია ამავე კვლევის თანახმად, ონარიის დასახლებაში მცხოვრები მოსახლეობის დასაქმების დონე დაბალია და ის 28% შეადგენს. აქედან, 12% თვითდასაქმებულია, სეზონურად 11 % მუშაობს, ხოლო 5% დაქირავებული შრომიდან აქვს შემოსავალი. „ონარიის დასახლებაში 34 ოჯახი არის ფულადი სოციალური დახმარების მიმღები. მაგრამ მიუხედავად ამისა, მოსახლეობის აბსოლუტური უმრავლესობა სიღარიბის ზღვარს მიღმა იმყოფება“, - ნათქვამია „საზოგადოების ჩართულობა დემოკრატიული თვითმმართველობისათვის“ ფარგლებში მომზადებულ კვლევაში. წარმოდგენილი კვლევის თანახმად, ონარიის დასახლებაში ყველაზე დიდ პრობლემას მოუწესრიგებელი კანალიზაცია წარმოადგენს, რომელიც ამავდოულად სასმელ წყალს აბინძურებს. კვლევის ფარგლებში ონარიის საექიმო ამბულატორიიდან გამოთხოვილი ინფორმაციის თანახმად, დასახლებაში მცხოვრებთა შორის გავრცელებულია, როგორც თანდაყოლილი, ისე ინფექციური დაავადებები. მათ შორის: სიმსივნეები, ენდოკრინული სისტემის, კვებისა და ნივთიერებათა ცვლის დარღვევით გამოწვეული დაავადებები, ასევე, ფსიქიკური და ქცევითი აშლილობები, კარდიოლოგიური, ნერვული სისტემის, სისხლის მიმოქცევის სისტემის, სუნთქვის ორგანოების, რევმატული დაავადებები, დიაბეტი, ეპილეფსია, ჰიპერტონია, ჰეპატიტები, ტუბერკულოზი, ძვალ-სახსართა სისტემის და შემაერთებელი ქსოვილების ა შარდ-სასქესო სისტემის და თანდაყოლილი ანომალიები. მათ შორის ტრავმები, მოწამვლები და გარეშე მიზეზების ზემოქმედების ზოგიერთი სხვა შედეგები. ამასთან, კვლევის ავტორები ადილობრივ და ცენტრალურ ხელისუფლებას რეკომენდაციებს სთავაზობენ და გამოთქვამენ მზაობას, ზემოაღნიშულ საკითხებზე, ნებისმიერ უწყებასთან ითანამშრომლონ. ონარიის მოსახლეობის ნაწილის თქმით, მათ დახმარებისთვის, ბევრჯერ მიმართეს ადგილობრივ ხელისუფლებას, თუმცა უშედეგოდ. ზუგდიდის მუნიციპალიტეტის გამგებლის მოადგილის მოვალეობის შემსრულებლის გიორგი თოდუას განმარტებით, ზემოაღნიშნული პრობლემა მათი უწყებისთის ცნობილია და პრობლემის მოგვარებაზე მუშაობა უკვე მიმდინარეობს. თოდუა აქვე დასძენს, რომ ონარიაში ინფრასტრუქტურული პროექტების განსახორცილებლად, როგორც ადგილობრივი ასევე ცენტრალური ბიუჯეტის სახსრები იქნება გამოყენებული.როგორც თოდუა აცხადებს, მიმდინარე წელს ონარიაში მოწესრიგდება შიდა გზების ნაწილი და სანიაღვრე სისტემა, დანარჩენი ინფრასტრუქტურული სამუშაოები, მომდევნო წლებში იქნება მოგვარებული. ცნობისთვის, პროექტის „საზოგადოების ჩართულობა დემოკრატიული თვითმმართველობისათვის“ ფარგლებში პერიოდულად იმართება შეხვედრები ზუგდიდის მუნიციპალიტეტის სოფლების მოსახლეობასთან. შეხვედრაზე მიმოიხილება ადგილობრივი თვითმმართველობის, მოქალაქეთა ჩართულობისა და თვითმმართველობის დაგეგმილი რეფორმის ძირითადი საკითხები. ასევე, ხდება კონკრეტულ თემში არსებული პრობლემების მოკვლევა, რაც გათვალისწინებულ იქნება ზუგდიდის მუნიციპალიტეტის გამგეობის, საკრებულოსა და სხვა უწყებებისათვის შესათავაზებელ რეკომენდაციებში. კოალიციური პროექტი „ევრაზიის თანამშრომლობის ფონდის“ მხარდაჭერით ხორციელდება.