სამეგრელო-ზემო სვანეთის გუბერნატორი თენგიზ გუნავა ხელისუფლებასთან, კერძოდ პრემიერ-მინისტრის გარემოცვასთან დაახლოებულ პირებს თხილის ფასის ხელოვნურად დაწევაში ადანაშაულებს. გუნავას თქმით, 21 სექტემბერს ზუგდიდში იმყოფებოდა პრემიერ-მინისტრის გარემოცვასთან დაახლოებული ბიზნესმენი, ორგანიზაცია „მსოფლიო ტექნიკის“ სამეთვალყურეო საბჭოს თავმჯდომარე ზვიად ბრეგვაძე, რომელიც ადგილობრივი თხილის შემსყიდველ ბიზნესმენებს შეხვდა და თხილის ფასის დაწევა მოითხოვა. მისივე განმარტებით, ბრეგვაძე თხილის ფასის შემცირებასთან ერთად, დიდი რაოდენობის თხილის ჩაბარებას მხოლოდ ერთ ქარხანაში ითხოვდა, რომელსაც ზუგდიდელები „ივანიშვილის ქარხანას“ უწოდებენ. „თხილის ქარხნის დირექტორებს და ზოგ შემთხვევაში მენეჯერებს უთხრეს, რომ წინააღმდეგ შემთხვევაში მათ პრობლემები შეექმნებათ“, - ამბობს თენგიზ გუნავა და დასძენს, რომ ამის შემდეგ ზუგდიდში თხილის ფასმა დაიწია. მისვე თქმით, ზუგდიდში რამდენიმე დღის წინ, თხილის ფასმა 3,20 ლარს მიაღწია, თუმცა მისვე თქმით, დღეს თხილის შესყიდვა მხოლოდ 2,80 ლარად ხდება.