თენგიზ გუნავას ბრალდებებზე თხილის გადამაუშავებელი ქარხნის „ნაის ნათსის“ დირექტორი შალვა ბურჭულაძე ამბობს, რომ „ქარხნის მეპატრონე ზვიად ბრეგვაძე ამჟამად საქართველოში არ იმყოფება და ის  ჩამოსვლისთანავე  თავად გააკეთებს ოფიციალურ განცხადებას“. ბურჭულაძე, თხილის ქარხნის დირექტორებთან  ზვიად ბრეგვაძის შეხვედას არც უარყოფს და არც ადასტურებს. შეგახსენებთ, რომ სამეგრელო-ზემო სვანეთის გუბერნატორი თენგიზ გუნავა ხელისუფლებასთან, კერძოდ პრემიერ-მინისტრის გარემოცვასთან დაახლოებულ პირებს, ზუგდიდში  თხილის ფასის ხელოვნურად დაწევაში ადანაშაულებს. გუნავას თქმით, 21 სექტემბერს ზუგდიდში  პრემიერ-მინისტრის გარემოცვასთან დაახლოებული ბიზნესმენი, ორგანიზაცია „მსოფლიო ტექნიკის“ სამეთვალყურეო საბჭოს თავმჯდომარე ზვიად ბრეგვაძე იმყოფებოდა, რომელიც ადგილობრივი თხილის შემსყიდველ ბიზნესმენებს შეხვდა. მისივე თქმით, ბრეგვაძემ მათ თხილის ფასის დაწევა მოსთხოვა. ამასთან, გუნავა ამბობს, რომ ბრეგვაძე თხილის ფასის შემცირებასთან ერთად, დიდი რაოდენობის თხილის ჩაბარებას მხოლოდ „ნაის ნათს“-ის ქარხანაში ითხოვდა. მისვე თქმით, ზუგდიდში რამდენიმე დღის წინ, თხილის ფასმა 3,20 ლარს მიაღწია, თუმცა დღეს უკვე თხილის შესყიდვა მხოლოდ 2,80 ლარად ხდება.