"ახალი მემარჯვენეების" ერთ-ერთმა ლიდერმა მანანა ნაჭყებიამ დღეს პრესკონფერენცია ჩაატარა და განაცხადა, რომ სოფლებში საჯარო სკოლების დიდი ნაწილი უმძიმეს მდგომარეობაშია. ხელისუფლების "წარმატებულ რეფორმებში" ერთ-ერთ მოწინავე ადგილს განათლების რეფორმა და საჯარო სკოლების თითქოს ბევრად გაუმჯობესებული მატერიალურ-ტექნიკური ბაზა იკავებს. თუმცა "ახალი მემარჯვენეების" ფართომასშტაბიანმა აქციამ  საქართველოს სოფლებში დაგვანახა, რომ რეალობა სულ სხვაა. საქართველოს პრაქტიკულად  ყველა რეგიონის სოფლებში საჯარო  სკოლების მდგომარეობა  უმძიმესია. მათი ნაწილის გამოყენება სასწავლო დაწესებულებად  საშიშია, უსაფრთხოების თვალსაზრისით. ამის დასადასტურებლად მანანა ნაჭყებიამ ჟურნალსტებს საქართველოს რამდენიმე სოფლის საჯარო სკოლების ფოტოები წარუდგინა. "ამ ფოტოებს კომენტარი არ სჭირდება. თუ ვინმეს მაინც დაებადება კითხვა და გაუჩნდება ეჭვი, რომ ეს სკოლის შენობებია, მინდა ვუთხრა, რომ ეს მართლაც სკოლების შენობებია მარტვილის, წალენჯიხის, ჩოხატაურის, ხაშურის რაიონებში, რომლებსაც,  როგორც თვითონ სოფლების მცხოვრებნი ამბობენ,  თავმოყვარე ადამიანი  საქონლის დასაბინავებლადაც არ გამოიყენებს. ამის მიხედვით ერთი დასკვნის გაკეთება შეიძლება - სოფელი და მისი სკოლა ამ ხელისუფლებისთვის პრიორიტეტი არ არის", -  განაცხადა მანანა ნაჭყებიამ. "ჩვენ ეჭვი გვაქვს, რომ განათლების სამინისტრო ამ შენობების შეკეთებას არც აპირებს და მისი სტრატეგია ასეთია: მატერიალურ-ტექნიკური მდგომარეობის საბაბით  ამ სკოლებს დახურვა  ემუქრებათ, ისე, როგორც უკვე დაიხურა ბევრი სკოლა საქართველოს რაიონებში და ბავშვებს რამდენიმე კოლომეტრზე ფეხით უწევთ სიარული"- განაცხადა მანანა ნაჭყებიამ. მისი თქმით, კანონის თანახმად უკვე დაწყებული უნდა იყოს  2013 წლის ბიუჯეტზე მუშაობის პროცესი  და საქართველოს მთავრობამ მინიმუმ უნდა გააორმაგოს ზოგადსაგანმანათლებლო სკოლების მატერიალურ-ტექნიკური ბაზის გაუმჯობესებისთვის გამოყოფილი თანხები.