დევნილთა სამინისტრო სოციალურ ქსელ "ფეისბუქის" მეშვეობით მიმართვას ავრცელებს, რომელსაც რადიო "ათინათი" უცვლელად გთავაზობთ. "გუშინ "დემოკრატიულმა მოძრაობამ" გაავრცელა ინფორმაცია, რომ ნაციონალური მოძრაობის და ქართული ოცნების საპრეზიდენტო კანდიდატთა წარმომადგენლები დევნილთა კომპაქტურ ჩასახლებაში დევნილების დაშინება-დაშანტაჟებას ეწევიან. თითქოსდა, თუკი ისინი მათთვის სასურველ კანდიდატს არ მისცემენ ხმას, დევნილებს აღარ დაუკანონდებათ საცხოვრებელი ფართები, დაიწყება მათი გამოსახლება და შეუწყდებათ 22 ლარიანი დახმარება". ნათქვამია მიმართვაში. დევნილებს არათუ არ შეუწყდებათ, არამედ უახლოეს მომავალში მათი დახმარება გაორმაგდება და გახდება 45 ლარი. რაც შეეხება ბინების დაკანონებას, ეს პროცესი დაწყებულია და უამრავი დევნილი შესძლებს მალე საკუთარ სახლებში იცხოვრონ, გარდა ამისა წლის ბოლომდე 2000-მდე დევნილი მიიღებს საკუთრებაში ბინებს! მომავალი წლიდან ეს პროცესი უფრო ფართო მასშტაბებს შეიძენს. რაც შეეხება ამა თუ იმ საპრეზიდენტო კანდიდატის მხარდაჭერას, ნებისმიერი ადამიანი თავისუფალია საკუთარ არჩევანში! დევნილთა სამინისტრო ბინების განაწილებისას თუ დაკანონებისას, არასდროს დაინტერესებულა მათი პარტიული კუთვნილებით! მივმართავთ დევნილებს! ნუ აჰყვებიან მავანთა პროვოკაციულ გამონათქვამებს და იყვნენ დარწმუნებულნი, რომ მათ უფლებებს იცავს სახელმწიფო და არა რომელიმე პოლიტიკოსი თუ თვითმარქვია აქტივისტი თუ მამასახლისი!