მთელ მსოფლიოში დღეს, მუსლიმები დღეს ყურბან-ბაირამის ანუ მსხვერპლშეწირვის დღესასწაულს აღნიშნავენ. ყურბან-ბაირამობა მარხვის თვის, რამაზან ბაირამიდან 70-ე დღეს აღინიშნება. ისლამის მიხედვით, მსხვერპლშეწირვის ტრადიცია აბრაამ შუამავლის შთამომავლობიდან მოდის. "აბრაამ შუამავალს შვილი არ ჰყავდა. მან ღმერთს შვილი სთხოვა და პირობა დადო, რომ საყვარელი არსების მსხვერპლშეწირვას გააკეთებდა. გაუჩნდა აბრამს შვილი ისმაილი და მან ღმერთს შესწირა აქლემი, ცხვარი, ძროხა. მაგრამ სიზმარში ნახა, რომ ის პირობას არ ასრულებდა, რომ მას უზენაესისთვის საკუთარი პირმშო უნდა შეეწირა. აბრაამი მორწმუნე იყო, დამორჩილდა ღვთის სურვილს, წაიყვანა შვილი შესაწირად. როდესაც ალლაჰმა დაინახა, რომ აბრაამი მზად იყო შვილის მსხვერპლად შესაწირად, ზვარაკი გამოაგზავნა და სთხოვა, შვილის ნაცვლად მისთვის ზვარაკი შეეწირა. აბრაამმა ღმერთს მადლობა გადაუხადა და თქვა, არ არის ღვთაება გარდა ალლაჰისა". მსხვერპლშეწირვისთვის ერთი ან რამდენიმე მუსლიმის ოჯახი იკრიბება და პირუტყვს კლავს, შემდეგ კი საქონლის ხორცს თანაბრად ანაწილებს. თითოეული ოჯახი თავიანთ წილს ახლობლებს და სოციალურად დაუცველ მოსახლეობას გადასცემს. შესაწირი ცხოველი აუცილებლად უნდა იყოს ჯანმრთელი. ასევე, მნიშვნელოვანია ასაკობრივი ფაქტორიც. ცხვარი 6 თვეზე ნაკლების არ უნდა იყოს, ხოლო მსხვილფეხა რქოსანი საქონელი მინიმუმ ორი წლის უნდა იყოს. მუსლიმებმა ყურბან-ბაირამის ლოცვა დილის 08:00 საათზე შეასრულეს. ყურბან ბაირამის დღესასწაული 3 დღეს გრძელდება. ამასთან საქართველოს პრემიერ-მინისტრი ბიძინა ივანიშვილი თბილისში, მეჩეთს ესტუმრება. როგორც ჟურნალისტებს სრულიად საქართველოს მუსლიმთა სამმართველოს ხელმძღვანელმა ჯემალ პაქსაძემ განუცხადა , შესრულდება ლოცვა და პრემიერ-მინისტრს დალოცავენ. "დღეს ჩვენ მივდივართ თბილისში. დედაქალაქის მეჩეთში პრემიერ-მინისტრი უნდა გვესტუმროს. ძალიან გახარებულები ვართ. კიდევ ერთხელ შევასრულებთ ლოცვას, დავლოცავთ ჩვენს პრემიერს, სრულიად საქართველოს, ჩვენს ქვეყანაში მცხოვრებ ყველა ეროვნების და რელიგიის ადამიანს", - განაცხადა ბათუმში ჯემალ პაქსაძემ.