"ნაციონალური მოძრაობის" საპრეზიდენტო კანდიდატის, დავით ბაქრაძის საარჩევნო შტაბში დარღვევებთან დაკავშირებით ბრიფინგი გამართეს. შტაბის ხელმძღვანელის ლაშა დამენიას  მტკიცებით, ზუგდიდის #18 საარჩევნო უბანზე "კარუსელი" დაფიქსირდა. მისივე თქმით, უბნის კომისიის თავმჯდომარე  მარკირება გავლილ ამომრჩეველს ხელახლა კენჭისყრის უფლებას აძლევდა. „ამ ადამიანს თავმჯდომარემ უთხრა, რომ გაიარე და მე ვიღებ ჩემს თავზე ყველაფერსო“,– უთხრა ჟურნალისტებს ლაშა დამენიამ. მისივე განცხადებით, ასევე დარღვევა დაფიქსირდა #103 საარჩევნო უბანზე, სადაც კომისიის წევრს, ფატიმა ჩომახიას გაყალბებული ჰქონდა საარჩევნო მოწმობა. #18 საარჩევნო უბნის კომისიის წევრების და დამკვირვებლების განმარტებით, საარჩევნო უბანზე ნამდვილად მოვიდა მარკირება გავლილი ადამიანი, თუმცა მას კომისიის თავმჯდომარემ და წევრებმა ხმის მიცემის უფლება არ მისცეს და უკან გაუშვეს. რაც შეეხება საარჩევნო მოწმობის გაყალბების ფაქტს ზუგდიდის #67 საოლქო საარჩევნო კომისიის თავმჯდომარის მოადგილე კობა კვარაცხელია პასუხობს და ამბობს, რომ ფატიმა ჩომახიას საარჩევნო უბანზე ყოფნის სრული უფლება ჰქონდა. თუმცა საოლქოში აღნიშნულ ფაქტს დადებითად არ აფასებენ. „ფატიმა ჩომახია არის კომისიის წევრი და ის გუშინ, 26 ოქტომბერს დაინიშნა. როგორც ჩანს მოწმობა ადრესატამდე დროულად არ მივიდა და ამიტომ დაფიქსირდა ეს ფაქტი“, -განუცხადეს რადიო „ ათინათს“ ზუგდიდის საოლქო კომისიაში.