სამეგრელო-ზემო სვანეთის სამხარეო პოლიციის სამმართველოს ყოფილი უფროსის, მეგის ქარდავას საქმეზე სასამართლო პროცესი დღეს, 7 ნოემბერს, ზუგდიდის რაიონულ სასამართლოში გაიმართა. ქარდავას ბრალი 144-ე მუხლის მე-2 ნაწილის „ა“, „ბ“ და „ზ“ ქვეპუნქტებით ედება , რაც ადამიანის წამებას გულისხმობს. ბრალის დამტკიცების შემთხვევაში მას 9-დან 15 წლამდე თავისუფლების აღკვეთა ემუქრება. პროკურატურის ცნობით, მეგის ქარდავამ აღიარებითი ჩვენების მიღების მიზნით, ბრალდებული ბელა როგავა აწამა. როგავა ამჟამად სასჯელს ქალთა #5 დაწესებულებაში იხდის. დღევანდელ პროცესზე მოწმის სახით ზუგდიდის ციხის ყოფილი თანამშრომელი ირმა ჯანელიძე დაიკითხა. მან , იმ ოქმის ( პირადი დათვალიერების) ნამდვილობა დაადასტურა, სადაც როგავას დაზიანებები იყო აღწერილი. ამავე პროცესზე პროკურატურის მიერ დაზარალებულად მიჩნეული, ბელა როგავას წარმოდგენა, გარკვეული მიზეზების გამო ვერ მოხერხდა. სასამართლო სხდომის დასრულების შემდეგ რადიო „ათინათთან“ მეგის ქარდავას ადვოკატმა მალხაზ ველიჯანაშვილმა განაცხადა, რომ მისი დაცვის ქვეშ მყოფი წარდგენილ ბრალდებაში თავს უდანაშაულოდ მიიჩნევს. „პროკურატურას ამ საქმეში მხოლოდ ერთადერთი დაზარალებული, ბელა როგავა ჰყავს. როგავა არის ის ადამიანი, რომელსაც ტაქსის მძღოლები აფხაზეთის ტერიტორიაზე გადაჰყავდა და შემდეგ ოჯახის წევრებს ფულს სძალავდა“, - აცხადებს ველიჯანაშვილი. ცნობისთვის, მეგის ქარდავა ამჟამად მიმალვაშია და მასზე საერთაშორისო ძებნაა გამოცხდებული.