ზუგდიდის მუნიციპალიტეტის სოფლებში დღეს, 9 ნოემბერს, ნარაზენსა და ახალსოფელში, პროექტ “საზოგადოების ჩართულობა დემოკრატიული თვითმმართველობისათვის” ფარგლებში მორიგი შეხვედრები გაიმართა. შეხვედრებზე, მიმოხილული იქნა ადგილობრივი მოსახლეობის პრობლემები, მოქალაქეთა ჩართულობისა და თვითმმართველობაში დაგეგმილი რეფორმის ძირითადი საკითხები. ახალსოფლის მოსახლეობის განმარტებით, სოფელს ძირითადად საბავშვო ბაღის პრობლემა აწუხებს. მათი თქმით, ამჟამად ბაღში მხოლოდ 30-მდე ბავშვი დადის, მაიშინ როდესაც ამის მსურველი გაცილებით მეტია. ამასთან, ადგილობრივები აცხადებენ, რომ არსებული საბავშვო ბაღი მოუწესრიგებელია. ახალსოფლში ნაპირსამაგრის გაკეთების აუცილებლობაზეც საუბრობენ და აცხადებენ, რომ ნაპირსამაგრის არარსებობა მოსახლეობას დიდ პრობლემას უქმნის. „უკვე რამდენი წელია მდინარეს ყანები და თხილნარი მიაქვს. გარდა ამისა, წელებია სკოლას საპირფარეშო არ გააჩნია, ამაზე ლაპარაკიც კი სირცხვილია, ამაზე ხომ უნდა იზრუნვოს ვინმემ. გარდა ამის დევნილებს წყალი შეფერხებით მიეწოდება“, - უთხრა რადიო „ათინათს“ ახალსოფლის მკვიდრმა ციალა წურწუმიამ. სოფელ ნარაზენის მოსახლეობას კი, როგორც თვითონ აცხადებენ, ძირითადად, შიდა გზების პრობლემა აწუხებს. მათი განმარტებით სოფლის შიდა გზები დაზიანებული და დაჭაობებულია. „ჩვენ ასევე გვაქვს ინდივიდუალური გამრიცხველიანების პრობლემა, რადგან სოფელ აბასთუმანის დენი გვაქვს. იქ კი ჯერ ეს პროცესი დაწყებული არ არის, გვვითხრეს მომავალ წელს გაგიკეთებთო“, - ამბობს ნარაზენის, რუსთაველის უბნის მკვიდრი ნეტო თოდუა. ნარაზენის მოსახლეობა ასვე დაინტერესდა თუ რა სახით მიიღებენ ისინი შეშის ვაუჩერს. როგორც მათ, ზუგდიდის გამგეობის სოფლის მეურნეობის სამსახურის უფროსმა ლერი დარჩიამ განუმარტა, მუნიციპალიტეტის მასშტაბით 10-მდე სახერხი გაიხსნება და იქიდან მოხდება მოსახლეობის შეშით მომარაგება. აღსანიშნავია, რომ ზუგდიდის მუნიციპალიტეტის გამგებლის მოადგილის მოვალეობის შემსრულებელმა, გიორგი თოდუამ, რომელიც შეხვედრებს პროექტის ფარგლებში ესწრებოდა, სოფლის მოსახლეობის პრობლემები ადგილზე მოისმინა. ასევე, კონკრეტულ თემში არსებული პრობლემები, რომელიც მსგავსი შეხვედრებიდან იქნება მოკვლეული, გათვალისწინებულ იქნება ზუგდიდის მუნიციპალიტეტის გამგეობის, საკრებულოსა და სხვა უწყებებისათვის შესათავაზებელ რეკომენდაციებში. შეხვედრები ტარდება ასოციაცია „ათინათის“, “საერთაშორისო გამჭვირვალობა-საქართველოს” ზუგდიდის ოფისის და “სამოქალაქო მონიტორინგისა და კვლევების ცენტრის” კოალიციური პროექტის “საზოგადოების ჩართულობა დემოკრატიული თვითმმართველობისათვის” ფარგლებში. პროექტი “ევრაზიის თანამშრომლობის ფონდის” ფინანსური მხარდაჭერით ხორციელდება.