სენაკის მუნიციპალიტეტის საკრებულოს თავმჯდომარე მურად შამათავა, რომელიც სასამართლომ თანამდებობაზე 23 ოქტომბერს აღადგინა, დღეს, 11 ნოემბერს სასამახურში გამოცხადდა. მისი თქმით, ის მუშაობას ჩვეულ რეჟიმში აგრძელებს. „ვიქნები მანამდე სანამ ამის საშუალებას მომცემენ. მაქვს ინფორმაცია, რომ საკრებულოს წევრები ჩემს გადაყენებას კვლავ გეგმავენ. ვფიქრობ საკრებულოს წევრები ზეწოლის ქვეშ არიან. რამდენიმე მათგანმა დამირეკა და მითხრა რა ვქნათ, გვავიწროვებენო.“, - უთხრა რადიო „ათინათს“ მურად შამათავამ. მისივე თქმით, ამ პროცესების უკან „ნაციონალური მოძრაობის“ წევრები დგანან. სენაკის საკრებულოს აპარატის უფროსის კობა ბარამიას თქით, საკრებულოში უკვე შესულია შამათავას თანამდებობიდან გადაყენების შესახებ წერილი, რომელსაც 19 დეპუტატი აწერს ხელს. „მოიწვევს თუ არა საკრებულოს თავმჯდომარე რიგგარეშე სხდომას ეს მისი გადასაწყვეტია“, - აცხადებს საკრებულოს აპარატის უფროსი კობა ბარამია. ცნობისთვის, მურად შამათავა სენაკის საკრებულოს თავმჯდომარის თანამდებობიდან 14 ივნისს, ხმათა უმრავლესობით(19 ხმა) გადააყენეს. როგორც ამავე სხდომაზე დეპუტატებმა აღნიშნეს, შამათავას გადაგყენების ძირითადი მიზეზები იყო: არაკომუნიკაბელურობა, საკრებულოს სხდომების მოუმზადებლობა და მისთვის დაკისრებული უფლებამოსილების არათანმიმდევრულად შესრულება. მურად შამათავა, სენაკის საკრებულოში ფრაქცია ,, ქართული ოცნება – თავისუფალი დემოკრატებს” წარმოადგენს და ის საკრებულოს თავმჯდომარედ საპარლამენტო არჩევნების შემდეგ იქნა არჩეული.