ოსკაროსანი ქრისტიან ბეილი, რომელსაც მაყურებელი ბეტმენიდან კარგად იცნობს, სულ მალე სტივ ჯობსს განასახიერებს! როგორც სულ რამდენიმე საათის წინ გახდა ცნობილი, მსახიობი მთავარ პერსონაჟად მოგვევლინება კომპანია Sony-ის ახალ ბიოგრაფიულ სურათში, რომელსაც “ჯობსი” ერქმევა. ფილმი დაეფუძნება უოლტერ ისააკსონის ბიოგრაფიულ წიგნს “სტივ ჯობსი”. ახალი ნამუშევრის რეჟისორი დენი ბოილი იქნება. სცენარს კი აარონ სორკინი დაწერს. რაც შეეხება საპროდუსერო საქმიანობას, მას სკოტ რუდინი, მარკ გორდონი და გაიმონ კასადი შეითავსებენ. როგორც ამბობენ, “ჯობსი” სამ ძირითად ნაწილად იქნება დაყოფილი: პირველი ნაწილი კომპანიის შექმნაზე მოგვითხრობს. შემდეგ გავიგებთ, რა ხდებოდა მას შემდეგ, რაც სტივმა კომპანია Apple-ი დატოვა. მესამე ნაწილი უკვე iPod-ს შეეხება. ყველაფერი ისეა, თითქოს “ბიტლზზე” იღებდე ფილმს! გარშემო უამრავი ადამიანია, რომელიც მას იცნობდა და აღმერთებდა. მთავარი როლის შემსრულებლად ლეონარდო დიკაპრიო განიხილებოდა მანამ, სანამ მსახიობი ოფიციალურად განაცხადებდა კინოდან აღებული შესვენების შესახებ. რეჟისორად დევიდ ფინჩერს ვარაუდობდნენ. თუმცა, როგორც ჩანს, გეგმები შეცვლილია და ინფორმაცია კი – ოფიციალური. “ჯობსის” გადაღებები გაზაფხულზე დაიწყება. ჯერჯერობით უცნობია პრემიერის სავარაუდო თარიღი.