საქართველოს პრემიერ-მინისტრმა ზუგდიდში ახლად გახსნილი თხილის გადამამუშავებელი საწარმო „ანკა ფეა ტრეიდი" და ცაიშის სასათბურე მეურნეობა „Stimor Associates”-- ი დაათვალიერა. მთავრობის მეთაური საწარმოში სამუშაო პროცესს გაეცნო და თხილის ფასით დაინტერესდა.  საწარმოში შეკრებილმა ფერმერებმა პრემიერს განუცხადეს, რომ წელს თხილის  რეკორდულად მაღალი ფასი - 8,75 ლარი დაფიქსირდა, მაშინ, როდესაც გასულ წლებში მისი ფასი 3 დან- 5 ლარამდე მერყეობდა. "ეს არის სანიმუშო ქარხანა, სადაც წარმოჩენილია სახელმწიფოს დაკერძო სექტორის თანამშრომლობა. მინდა, დიდი მადლობა გადავუხადო კომპანიის დამფუძნებლებს და ასევე ფერმერებს, რომლებიც ჩართული არიან ამ პროგრამაში. სახელმწიფოსთან ერთად კერძო სექტორის აქტიურობა ძალიან მნიშვნელოვანია.  სახელმწიფოს ხელშეწყობით კეთდება ის, რომ მსგავსი წარმატებული პროექტები თვალსაჩინოა. აღსანიშნავია,  რომ ეს არის შვეიცარიული ინვესტიცია, რომელიც სახელმწიფოს ხელშეწყობით განხორციელდა", -განაცხადა პრემიერ-მინისტრმა. ამასთან, პრემიერი ცაიშის სასათბურე მეურნეობას ეწვია და სამშენებლო პროცესი დაათვალიერა. მან ცაიშის  სასათბურე მეურნეობას ეროვნული პროექტი უწოდა. „ეს არის ეროვნული უსაფრთოების საკითხები. ჩვენ აქ წარმოებული პროდუქციით  ჩავანაცვლებთ დაბალ ხარისხიან იმპორტულ პროდუქტს. ადგილობრივი ბაზრის დაკმაყოფილების შემდეგ აქ მოყვანილ საქონელს გავიტანთ ექსპორტზე", - აღნიშნა ირაკლი ღარიბაშვილმა. პრემიერ-მინისტრთან ერთად   ახალი საწარმოებში სოფლის მეურნეობის მინისტრი ოთარ დანელია,  შვეიცარიის ელჩი საქართველოში გიუნტერ ბეხლერი,  სამეგრელო-ზემო სვანეთის გუბერნატორი ლევან შონია და ქალაქ ზუგდიდის მერი ირაკლი გოგოხია იმყოფებოდნენ.

თხილის გადამამუშავებელი საწარმო „ანკა ფეა ტრეიდი“ დაფინანსებულია სოფლის მეურნეობის პროექტების მართვის სააგენტოს შეღავათიანი აგროკრედიტის პროექტით. პროგრამის დახმარებით საწარმომ 600 000 დოლარის სესხი ახალი თხილის გადამამუშვებელი საწარმოს მშენებლობისთვის აიღო. შვეიცარიულმა კომპანიამ საკუთარი სახსრებით დამატებით 400 000 დოლარის ოდენობის ინვესტიცია განახორციელა. საწარმოში, რომელიც 2014 წელს აშენდა, მუდმივად დასაქმებულია 20 ადამიანი, სეზონზე კი დასაქმებულთა რაოდენობა 120-მდე გაიზრდება.

მაღალტექნოლოგიური სასათბურე მეურნეობა „Stimor Associates”-ის მშენებლობა სოფელ ცაიშში 2014 წლის ივნისში დაიწყო და პირველი ეტაპი ნოემბერში დასრულდება. ინვესტორი 3 ჰექტარ ფართობზე გაშენებული სასათბურე მეურნეობის გაფართოებას და 5 წლის განმავლობაში 30 ჰექტარი ფართობის ათვისებას გეგმავს. ობიექტზე 500-მდე ადამიანი დასაქმდება, ხოლო ინვესტიციის მოცულობა 30 მილიონი დოლარია.