NASA-მ განაცხადა, რომ Google-თან 60-წლიანი საიჯარო კონტრაქტი გააფორმა, რომელიც NASA-ს კალიფორნიაში მდებარე ისტორიული ავიაბაზის ნაწილის დაქირავებას ითვალისწინებს. ამერიკული ტექნოლოგიური კომპანია ამ ტერიტორიის გამოყენებას გეგმავს თავისი პროექტებისთვის ავიაციის, კოსმოსის ათვისების და რობოტოტექნიკის სფეროებში. Google-ის ქვედანაყოფი, რომლის სახელწოდებაა Planetary Ventures-ი, $1.16 მლრდ-ს გადაიხდის ამ საიჯარო კონტრაქტში. დოკუმენტი კომპანიას საშუალებას აძლევს თავისი მიზნებისთვის გამოიყენოს და რესტავრაცია გაუკეთოს ავიაბაზა Moffett Federal Airfield-ს. დაქირავებულ ტერიტორიაზე განთავსებულია სამი ანგარი საჰაერო ხომალდებისთვის და მათ შორის ისტორიული Hangar One და ასევე ფრენების მართვის ცენტრი, 2 ასაფრენ-დასაფრენი ბილიკი და გოლფის მოედანი. საიჯარო კონტრაქტიდან $1,16 მლრდ-ის მიღების გარდა, NASA ასევე შეძლებს წელიწადში დაახლოებით $6.3 მლნ-ის დაზოგვას საოპერაციო დანახარჯებზე. დაქირავებული ბაზა დაახლოებით 5 კილომეტრის მანძილზეა Google-ის მთავარი ოფისიდან მაუნტინ ვიუში. როგორც ადრე გახდა ცნობილი, Google გეგმავს $1 მლრდ-ზე მეტი ჩადოს ატმოსფერული თანამგზავრების და სხვა უპილოტო საფრენი აპარატების წარმოების განვითარებაში, რათა პლანეტის ისეთ წერტილებს მიაწოდოს ინტერნეტი, სადაც ახლა ის არაა. Google-მა უკვე შეიძინა უპილოტო საფრენი აპარატების მწარმოებელი კომპანია Titan Aerospace და რამდენიმე ტექნოლოგიური სტარტაპი, რომლებიც თანამგზავრულ და რობოტოტექნოლოგიებზე მუშაობენ.