კოალიცია “ქართული ოცნების” წევრის სერგო ჩაჩიბაიას საქმეზე დაკავებული ყოფილ უბნის ინსპექტორ–გამომძიებელი ემზარ მაისურაძე ზუგდიდის საქალაქო სასამართლომ დამნაშავედ ცნო და ამნისტიის გათვალისწინებით 4 წლითა და 6 თვით თავისუფლების აღკვეთა მიუსაჯა. ასევე, ამავე საქმეზე დაუსწრებლად და ამნისტიის გათვალისწინებით 6 წლით თავისუფლების აღკვეთა მიესაჯა ყოფილ უბნის ინსპექტორ–გამომძიებელს გელა ნაროშვილს. მოქალაქე ოთარ მოვსესიანს (ქეცბაია) კი ამნისტიის გათვალისწინებით 4 წლითა და 6 თვით თავისუფლების აღკვეთა შეეფარდა. ემზარ მაისურაძეს ადვოკატი გია გოროზია მოსამართლე შოთა ბიჭიას გადაწყვეტილებას გაუგებარს უწოდებს და აცხადებს, რომ ის ზუგდიდის სასამართლოს გადაწყვეტილებას ქუთაისის სააპელაციო სასამართლოში გაასაჩივრებს. "მოსამართლეს გადაწყვეტილება არის დაუსაბუთებელი. საინტერესოა რას დაეყრდნო სასამართლო და რის საფუძველზე მიიღო გადაწყვეტილება. ვფიქრობ, მოსამართლემ გადაწყვეტილება გარკვეული ზეწოლის შედეგად მიიღო" - უთხრა რადიო "ათინათს" გია გოროზიამ. მოსამართლის გადაწყვეტილებას ასევე უსამართლოდ მიიჩნევენ ემზარ მაისურაძის ოჯახის წევრები და ახლობლები. "ჩემი ქმარი უდანაშაულოა. ესენი არაადამიანები არიან. აუცილებლად გავასაჩივრებთ, მაგრამ ამ საქართველოში სად უნდა გავსაჩივროთ, ვის უნდა გავუსაჩივრო", - ამბობს ცირა ჭურღულია. პოლიტიკური პარტია „ჩვენი საქართველო – თავისუფალი დემოკრატების“ წევრი, სერგო ჩაჩიბაია სამართალდამცავებმა ზუგდიდში, პუშკინის ქუჩაზე 2012 წელს დააკავეს. მას ზუგდიდის რაიონულმა სასამართლომ 4,6 წლით თავისუფლების აღკვეთა მიუსაჯა. საპარლამენტო არჩევნების შემდეგ, ჩაჩიბაია მეორე ინსტანციის სასამართლომ გაათავისუფლა. პროკურატურის ცნობით, საგამოძიებო უწყება ემზარ მაისურაძეს სამსახურებრივი უფლება მოსილების გადამეტებას, მტკიცებულებების ფალსიფიკაციას და პოლიტიკურ-საზოგადოებრივ მოღვაწეობასთან დაკავშირებით პირის დევნას ედავება. „სამეგრელო-ზემო სვანეთის საოლქო პროკურატურის მიერ სამსახურებრივი უფლებამოსილების გადამეტების, მტკიცებულებების ფალსიფიკაციის, პოლიტიკურ-საზოგადოებრივ მოღვაწეობასთან დაკავშირებით პირის დევნისა და განზრახ უკანონო დაკავების ფაქტზე, დაკავებულია შსს სამეგრელო-ზემო სვანეთის სამხარეო მთავარი სამმართველოს ზუგდიდის რაიონული სამმართველოს ყოფილი უბნის ინსპექტორ-გამომძიებელი ემზარ მაისურაძე. ასევე ბრალი დაუსწრებლად წარედგინათ ზუგდიდის რაიონული სამმართველოს უბნის ინსპექტორების განყოფილების უფროს-გამომძიებელს გელა ნაროუშვილს და მოქალაქე ოთარ მოვსესიანს. გამოძიებით დადგინდა, რომ 2012 წლის მარტში ემზარ მაისურაძემ და გელა ნაროუშვილმა, ოთარ მოვსესიანისა დასხვა პირების დახმარებით, კოალიცია „ქართული ოცნების“ პოლიტიკური საქმიანობის ხელისშეშლის და განსხვავებული პოლიტიკური შეხედულებების მქონე პირთა დაშინების მიზნით, კოალიცია „ქართულ ოცნებაში“ შემავალი პოლიტიკური პარტია  „ჩვენი საქართველო – თავისუფალი დემოკრატების“ ერთ-ერთი აქტიური წევრი, სერგო ჩაჩიბაია, ყოველგვარი ფაქტობრივი და სამართლებრივი საფუძვლის გარეშე, უფლება მოსილების გადამეტებით,  წინასწარ შემუშავებული გეგმის მიხედვით, კონფლიქტური სიტუაციის ინსცენირების შედეგად, უკანონონოდ დააკავეს. სისხლის სამართლის საქმეზე მტკიცებულებათა ფალსიფიკაციის მიზნით  მაისურაძემ თანმხლებ პირებთან ერთად განზრახ დააზიანა სამსახურებრივი ქურთუკი და პოლიციის სამსახურებრივი ავტომანქანის სავარძელი, რაც შემდეგში სერგო ჩაჩიბაიას მიერ, თითქოს და პოლიციის მუშაკების მიმართ წინააღმდეგობის გაწევის ერთ-ერთი მტკიცებულება გახდა. სერგო ჩაჩიბაია მიეცა პასუხისგებაში სსკ 353-ე მუხლის პირველი ნაწილით და სასჯელის ზომად განესაზღვრა 4 წლითა და 6 თვით თავისუფლების აღკვეთა. საქმეზე გრძელდება გამოძიება საქართველოს სისხლის სამართლის კოდექსის 25-ე, 147-ემუხლის პირველი ნაწილით, 156-ემუხლით, 333-ე მუხლის პირველი ნაწილითა და 3691-ე მუხლის პირველი ნაწილით, რაც თავისუფლების აღკვეთას რვა წლამდე ვადით ითვალისწინებს“, – ნათქვამია უწყების განცხადებაში, რომელიც პროკურატურამ ემზარ მაისურაძის დაკავების დროს გაავრცელა.