“ფარგო” წლის ერთ-ერთ საუკეთესო სერიალად რომ დასახელდა, არავის გაკვირვებია. მიუხედავად იმისა, რომ ეპიზოდები ძმები კოენების ლეგენდარული ფილმის მოტივებზეა დაფუძნებული, შოუმ მაინც მოახერხა, ამ ნამუშევარზე დიდი კვალი და თავისი ნიშა დაემჩნია… ამჯერად, “ფარგო” ათი ახალი ეპიზოდით აპირებს დაბრუნებას. მეორე სეზონში წამყვანი როლი პატრიკ უილსონს ერგება. სიუჟეტი 1979 წლის სამხრეთ დაკოტასა და მინესოტაში განვითარდება და ახალგაზრდა ლუ სოლვერსონზე მოგვიყვება. უკვე დადასტურდა, რომ მეორე სეზონში ტედ დენსონი და ჯინ სმარტიც მიიღებენ მონაწილეობას. მეორეხარისხოვან როლებს ნიკ ოფერმენი, ბრედ გარეტი, ბოკიმ ვუდბაინი, ჯეფრი დონოვანი, ანგუს სემპსონი და კირან კალკინი შეასრულებენ. როგორც მანამდეც შეგატყობინეთ, “ფარგოს” შემოქმედებით ჯგუფს კირსტენ დანსტიც უერთდება. ის განასახიერებს გოგონას, რომელიც საზოგადოების მიერ დაწესებული ნორმებით იტანჯება და ცდილობს, გაერკვეს, ვინ არის და რა სურს სინამდვილეში. მისი მეუღლის როლში ჯეს პლემონსი მოგვევლინება. “ფარგო” მეორე სეზონით 19 იანვარს ბრუნდება.