საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილე შოთა რეხვიაშვილი ზუგდიდში იმყოფება. ის მონიტორინგის შედეგებს ადგილზე ეცნობა, რომელიც ბინის მიღების მსურველებს უტარდებათ. მინისტრის მოადგილე იმ ნგრევად ობიექტზეც, ე.წ „კარვის ჩასახლებაშიც“ იმყოფებოდა, საიდანაც სამინისტრო დევნილ ოჯახებს ახალაშენებულ კორპუსებში ავტომატურად გადაიყვანს. „კარვის ჩასახლებაში" ამჟამად 30 - მდე დევნილი ოჯახი ცხოვრობს. "დევნილები, რომლებიც ამ ე.წ „კარვის ჩასახლებაში" ცხოვრობენ, ყოველგვარი კრიტერიუმების გარეშე, როგორც ნგრევად ობიექტში მცხოვრებლები, სულ მალე მიიღებენ ახალ საცხოვრებელ ფართებს.  დღეს ჩვენ მათ ეს ფაქტი კიდევ ერთხელ დავუდასტურეთ და ვამცნეთ ეს სასიხარულო ამბავი", - თქვა შოთა რეხვიაშვილმა. ზუგდიდში, გერმანიის განვითარების ბანკის დაფინანსებით, თაბუკაშვილის ქუჩაზე, დევნილთა გრძელვადიანი განსახლების მიზნით, 10 კორპუსის (320 ბინა) მშენებლობა მიმდინარეობს. აღნიშნულ ობიექტზე, საცხოვრებელი ფართის მიღების მოთხოვნით, განცხადება (აპლიკაცია) 4190-მა დევნილმა ოჯახმა შეავსო.  საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს დევნილთა საკითხების დეპარტამენტმა, დევნილი ოჯახების მიერ წარმოდგენილი დოკუმენტაციის საფუძველზე, თითოეულ აპლიკანტს წინასწარი ქულა მიანიჭა. სიის გამოქვეყნებიდან  15 სამუშაო დღის ვადაში დევნილ ოჯახებს  შესაძლებლობა მიეცათ დამატებითი დოკუმენტაცია წარედგინათ, რასაც შესაძლოა გავლენა  მოეხდინა მათთვის წინასწარ მინიჭებულ  ქულებზე. სამინისტროს თანამშრომლები ყველა დევნილი ოჯახის მდგომარეობას ადგილზე სწავლობენ. ზუგდიდში დევნილებისთვის განკუთვნილი კორპუსების მშენებლობა, სავარაუდოდ, მიმდინარე წლის  10 თებერვლამდე დასრულდება.