გასულ წელს Netflix-მა ბევრ ახალ ფილმზე მოიპოვა სადისტრიბუციო უფლება. მათ შორის ჯერ კიდევ საპრემიერო ფილმებიცაა. Amazon-მა კი ნამდვილად ახალი სიტყვა თქვა სერიალით, რომელმაც საუკეთესო კომედიური სერიალისა და საუკეთესო მსახიობის (კომედიურ სერიალში) ნომინაციებში “ოქროს გლობუსი” დაიმსახურა. ალბათ, ეს გახდა სტიმული, რომ სტუდიას მეტი სერიალისა და მხატვრული ფილმის გადაღებისა და წარმოების სურვილი გასჩენოდა. თუ გამომცემლობა Variety-ს დავუჯერებთ, Amazon-ი წელიწადში მინიმუმ 12 ახალი ფილმის გამოშვებას აპირებს! ეს ახალი ამბავი ბევრი კარგი სიახლის მომტანი იქნება. სავარაუდოა, Netflix-მა და Amazon-მა წლევანდელი Sundance-ის კინოფესტივალის დიდი ყურადღება დაიმსახურონ. გარდა ამისა, ორივე სტუდია დისტრიბუციის ახალ ფორმას ნერგავს – მათ მიერ წარმოებული ფილმების ყურება მსურველს შედარებით მარტივად შეეძლება: კინოთეატრებში ჩვენების შემდეგ, ფილმები მათ არხებზე განთავსდება და იმის მაგივრად, რომ ცალცალკე იყიდონ ფილმები, მაყურებლებს შეეძლებათ, არხის გამოწერით, ყველა სურათს ერთად მიაწვდინონ ხელი. ყველა ახალ დეტალს ჩვენს ვებგვერდზე შეგატყობინებთ.