ამერიკულმა კომპანიამ “შარლი ებდოზე” გადაღებული დოკუმენტური სურათის სადისტრიბუციო უფლებები მოიპოვა.

“შარლი ებდო”, იგივე “შარლის ყოველკვირეული”, ფრანგული სატირული ყოველკვირეული ჟურნალია, რომელიც ნონკონფორმისტულ სტილში ასახავს კარიკატურებს, რეპორტაჟებს, პოლემიკებსა და ხუმრობებს და აქვეყნებს სტატიებს რელიგიის, პოლიტიკის, კულტურისა და სხვა საკითხების შესახებ. სწორედ რელიგიური თემატიკისა და კარიკატურების ერთობლიობამ გამოიწვია 2015 წლის 7 იანვარს განხორციელებული შეიარაღებული თავდასხმა რედაქციაზე. ამის შედეგად „შარლი ებდოს“ 10 თანამშრომელი და პოლიციის 2 ოფიცერი გარდაიცვალა, 10-ზე მეტი კი დაშავდა. თავდასხმამდე ერთი საათით ადრე, ჟურნალმა  აბუ ბაქრ ალ-ბაღდადის კარიკატურა გამოაქვეყნა. რასაც ისლამისტების აღშფოთება და საპასუხო ძალისმიერი ქმედება მოჰყვა. რედაქციას თავს ორი ნიღბიანი ადამიანი ავტომატებით დაესხა და იქ მომუშავე პერსონალს ცეცხლი გაუხსნა. დაღუპულთა შორის იყვნენ ცნობილი კარიკატურისტები: სტეფან შარბონიე, ჟან კაბიუ,ჟორჟ ვოლინსკი და ბერნარ ვერლაკი. სწორედ ამ მოვლენას ასახავს დოკუმენტური სურათი, რომლის რეჟისორი დენიელ დეკონტეა.

როგორც ამბობენ, საფრანგეთში ფილმის მიმართ ინტერესი არც თუ ისე დიდია. შესაბამისად, ამერიკაში დისტრიბუცია მის პოპულარობაზე საგრძნობლად იმოქმედებს და საერთაშორისო საზოგადოება უფრო მეტად დაინტერესდება მომხდარი ამბის მნიშვნელოვანი დეტალებით.

დოკუმენტურ სურათს შვედეთში, იტალიასა და გერმანიაშიც უჩვენებენ.