აფხაზეთის მთავრობამ ზუგდიდში გასვლითი სამთავრობო სხდომა გამართა.  სხდომას, აფხაზეთის მთავრობის, დევნილთა სამინისტროს, ადგილობრივი ხელისუფლებისა და არასამთავრობო ორგანიზაციების წარმომადგენლებთან ერთად, დევნილებიც ესწრებოდნენ. სამთავრობო სხდომა ზუგდიდში სამეგრელო-ზემო სვანეთის გუბერნატორის ლევან შონიას მოწვევით ჩატარდა. აფხაზეთის მთავრობის წარმომადგენლებმა სხდომაზე შესრულებულ და დაგეგმილ პროექტებზე ისაუბრეს. აფხაზეთის მთავრობის ხელმძღვანელის ვახტანგ ყოლბაიას განცხადებით, ზუგდიდში 2016 წლის ბოლოს დევნილების ბინით დაკმაყოფილების საკითხი მოგვარებული იქნება. სამეგრელო-ზემო სვანეთის გუბერნატორმა აფხაზეთის მთავრობის წარმომადგენლებს რეგიონში უფრო ხშირად ჩამოსვლისკენ მოუწოდა, რადგან ეს, მისივე თქმით, დევნილებისთვის მორალურ მხარდაჭერას წარმოადგენს. გარდა ამისა, რამდენიმე დევნილმა საკუთარი ოჯახის პრობლემა აფხაზეთის მთვარობის წარმომადგენლებს პირადად გააცნო. აფხაზეთიდან დევნილი  თინა ქირია ბინით უზრუნველყოფას ითხოვს. მისი თქმით, ის უკვე ერთი წელია ნათესავის სახლში, სხვისი ლუკმა-პურის ხარჯზე ცხოვრობს.  მანამდე კი ის, ოჯახთან ერთად, უკრაინაში ცხოვრობდა. "იმდენად გვიჭირს, რომ დღეში მხოლოდ ერთხელ ვიკვებებით. სახლში ავადმყოფი მეუღლე და უცხო ენების სპეციალისტი ქალიშვილი მყავს, ვერც ერთმა სამსახური ვერ ვიშოვეთ", - თქვა თინა ქირიამ. აფხაზეთის მთავრობის წარმომადგენელებმა ქირიების ოჯახს დახმარებისა და მათი საკითხის შესწავლის პირობა მისცეს. ქალაქ ზუგდიდში, ბარამიას ქუჩა №7-ში, 34 თორმეტსართულიანი კორპუსის მშენებლობა დაიწყება, სადაც საბოლოო ჯამში 2460 დევნილი ოჯახი ბინას საკუთრებაში მიიღებს. ეს ინფორმაცია საქართველოს ოკუპირებული ტერიტორიებიდან იძულებით გადაადგილებულ პირთა , განსახლებისა და ლტოლვილთა მინისტრმა სოზარ სუბარმა დევნილებს დღეს გამართულ შეხვედრაზე მიაწოდა. შეხვედრას მინისტრის მოადგილე მამუკა ცოტნიაშვილი, სამეგრელო-ზემო სვანეთის გუბერნატორი ლევან შონია, ქალაქ ზუგდიდის მუნიციპალიტეტის საკრებულოს თავმჯდომარე მერაბ ქვარაია, ზუგდიდის მუნიციპალიტეტის გამგებელი ედიშერ თოლორაია და აფხაზეთის ლეგიტიმური მთავრობის თავმჯდომარე ვახტანგ ყოლბაია დაესწრნენ. შეხვედრის მონაწილეების ინფორმაციით ბინების ტერიტორიის განაშენიანება 3,5 ჰექტარზე მიმდინარეობს,სადაც თანამედროვე არქიტექტურის კორპუსები აშენდება და ინფრასტრუქტურა მოწესრიგდება.მათივე თქმით კომპლექსის აშენების შემდეგ დევნილთა განსახლების გრძელვადიანი პრობლემა მოიხსნება.