დღეს ქალაქ ზუგდიდის მუნიციპალიტეტის ,ადგილობრივი ბიუჯეტიდან დაფინანსებული პროექტების შემსწავლელი, კომისიის სხდომა ხმაურიანად წარიმართა. „ზუგდიდის განვითარების ცენტრის“ მსმენელებმა და მოხალისე მასწავლებლებმა, რომლებიც დაფინანსებას 3 თვეა ითხოვენ, კომისია არაეფექტურ მუშაობასა და პროცესების განზრახ გაჭიანურებაში დაადანაშაულეს. თავის მხრივ, კომისიის თავმჯდომარე გიორგი თოდუა ცენტრის წარმომადგენლების ბრალდებებს უარყოფს და მათ ბავშვებით მანიპულირებასა და ინტრიგებში ადანაშაულებს. კომისიამ სხდომაზე  ორი საკითხი  განიხილა - დებულებაში ცვლილებების შეტანა და ცენტრის დაფინანსება. კომისიის ერთ-ერთმა წევრმა გურამ ჩიხლაძემ აღნიშნა, რომ დებულება დასახვეწია და მასში ცვლილებებია შესატანი. სხდომაზე ითქვა, რომ ცენტრის დაფინანსების საკითხს კომისია მას შემდეგ განიხილავს, რაც ცენტრი დამატებით დოკუმენტაციას, მათ შორის, მოხალისე მასწავლებლების კავალიფიკაციის დამადასტურებელ დოკუმენტებს წარადგენს. გარდა ამისა, კომისია ცენტრში მიმდინარე საგანმანათლებლო პროცესებს შეისწავლის. ზუგდიდის განვითარების ცენტრი, სადაც ცენტრის წარმომადგენლების ინფორმაციით ,1 300-მდე ბავშვი სწავლობს ,ფართის დაფინანსებას ითხოვს, რისთვისაც, მათი გათვლებით, 18 ათასი ლარია საჭირო. კომისიის შემადგენლობაში ადგილობრივი თვითმმართველობის, არასამთავრობო სექტორისა და მედიის წარმომადგენლები შედიან. ცნობისთვის, ქალაქ ზუგდიდის მუნიციპლიტეტი ადგილობრივი ბიუჯეტიდან სოციალურად დაუცველი მოსახლეობის ჯანმრთელობისა და საყოფაცხოვრებო პირობების გაუმჯობესების მიზნით, არასამთავრობო ორგანიზაციებისა და საინიციატივო ჯგუფის პროექტებს დააფინანსებს. ამისთვის ბიუჯეტში 30 ათასი ლარია გათვალისწინებული.