საქართველოს პრემიერ-მინისტრმა ირაკლი ღარიბაშვილმა გამგებლებთან, მერებთან და გუბერნატორებთან შეხვედრაზე გასული წელი შეაჯამა და ის ქალაქები და გამგეობები დაასახელა, სადაც ეფექტურად და სრულად აითვისეს გამოყოფილი თანხები.  "მე მინდა გამოვყო რამდენიმე მათგანი. დავიწყებ კახეთიდან. სიღნაღი, გურჯაანი, თელავი, დედოფლისწყარო, მათ აქვთ ათვისება 93-94%-ის ფარგლებში. სამცხე-ჯავახეთში, ახალქალაქი, ახალციხე, ბორჯომი, ადიგენი – აქ 90%-ის ფარგლებშია ათვისება გასულ წელს. იმერეთში, ბაღდათის მუნიციპალიტეტი, ხარაგაული, თერჯოლა, საჩხერე, ხონი, ჭიათურა, ასევე, ქვემო ქართლი, დმანისი, ბოლნისი, მარნეული, წალკა – აქაც არის ძალიან კარგი შესრულება. სამეგრელო-ზემო სვანეთში ხობის მუნიციპალიტეტს აქვს 100%-იანი ათვისება. სენაკი, აბაშა, მარტვილი, ზუგდიდი ასევე მაღალი ათვისებაა. გურიაში - ჩოხატაური, ოზურგეთი, აჭარაში – შუახევი არის 100%-იანი ათვისება. ხელვაჩაურში არის 99%-იანი ათვისება, ხულოში 98%-იანი", - განაცხადა ღარიბაშვილმა. მისი თქმით, დანარჩენ მუნიციპალიტეტებს აქვთ შედარებით დაბალი ათვისებები, რომელიც სასწრაფოდ უნდა გამოასწორდეს. "წელს გვაქვს ჩვენ მნიშვნელოვანი პროექტები დაწყებული. მინდა ყველას მოგიწოდოთ, მაქსიმალურად გავაქტიურდეთ და მოვახდინოთ კონცენტრირება ყველა იმ პროექტზე, რომელიც არის დაწყებული. ჩვენ დროულად უნდა დავასრულოთ ყველა პროექტი, დროულად უნდა გამოვაცხადოთ ტენდერები და პროექტების მიმდინარეობას გავუწიოთ კონტროლი და მონიტორინგი", - განაცხადა პრემიერ-მინისტრმა.