„საქართველოს ახალგაზრდა იურისტთა ასოციაციის"  ზუგდიდის ოფისი მოქალაქე თამუშა ახალაიას გატაცების ფაქტზე ინფორმაციას ავრცელებს. ორგანიზაციის მიერ გამოქვეყნებულ განცხადებაში ნათქვამია, რომ თამუშა ახალაია, რომელიც გაურკვეველ ვითარებაში გარდაცვლილი შვილის საქმის ობიექტურ გამოძიებას ითხოვს, დაუდგენელმა პირებმა გაიტაცეს და ერთი დღის შემდეგ, პოლიციის ერთ-ერთ ქვეგანყოფილებასთან ახლოს ჩამოსვეს. საია, აღნიშნულ ფაქტთან დაკავშირებით, პროკურატურისგან რეაგირებას ითხოვს. ორგანიზაციის მიერ გავრცელებულ განცხადებას რადიო "ათინათი"უცვლელად გთავაზობთ:

ბოლო რამდენიმე თვის განმავლობაში საქართველოს ახალგაზრდა იურისტთა ასოციაციას მომართა ოცამდე პირმა, რომლებიც პოლიციელთა მხრიდან მათ მიმართ განხორციელებულ უკანონო და ძალადობრივ ქმედებებზე საუბრობენ. კერძოდ, ისინი აცხადებენ, რომ პოლიციის თანამშრომლებმა დაკავებისას და შემდგომ პერიოდში მიაყენეს ფიზიკური და სიტყვიერი შეურაცხყოფა, ხოლო ზოგიერთი მათგანი ასევე საუბრობს პოლიციის მხრიდან ნარკოტიკული ნივთიერებების და იარაღის ჩადების ფაქტზე.

ერთ-ერთი მომმართველი გახლდათ, თამუშა ახალაია, რომელიც აცხადებს, რომ 2014 წლის 29 აგვისტოს იმყოფებოდა სამეგრელო-ზემო სვანეთის საოლქო პროკურატურაში, სადაც ითხოვდა სამეგრელო ზემო სვანეთის მთავარ პროკურორ გ.უ-თან შეხვედრას, თუმცა პროკურორს ვერ შეხვდა. (თამუშა ახალაიას შვილი დაუდგენელ ვითარებაში გარდაიცვალა, თამუშა ახალაია აცხადებს, რომ გამოძიება არაეფექტურად მიმდინარეობს. აღნიშნულ საკითხზე სურდა მას პროკურორთან შეხვედრა). იგი აცხადებს, რომ სახლში მგზავრობის დროს გზაზე მის გვერდით გაჩერდა ა/მანქანა, საიდანაც გადმოვიდა ორი უცნობი პიროვნება, რომლებმაც თავზე ტომარა ჩამოაცვეს, დაადეს ხერბორკილები, მანქანაში იძულებით ჩასვეს, და წაიყვანეს უცნობი მიმართულებით. რამდენიმე წუთის შემდეგ ჩამოსვეს მისთვის უცნობ ადგილას (თავზე ტომარა არ მოუცილებით) და უთხრეს, რომ თავი დაენებებინა მისი შვილის მკვლელობის საქმეზე განცხადებების წერისთვის. თამუშა ახალაის განმარტებით, იგი კვლავ ჩასვეს ა/მანქანაში და მხოლოდ დილით გამთენიისას ჩამოსვეს საქართველოს შსს სოფ. ლიის პოლიციის ქვეგანყოფილებასთან ახლოს. თამუშა ახალაიამ აღნიშნულ ფაქტთან დაკავშირებით განცხადებით მიმართა საქართველოს შსს სოფ. ლიის პოლიციის ქვეგანყოფილებას. მის განცხადებაზე გამოძიება დაიწყო მხოლოდ მესამე დღეს, თუმცა გამოძიება მოგვიანებით შეწყდა. თამუშა ახალაიას აქვს ეჭვი, რომ მისი გატაცება მოხდა საქართველოს შსს-ს თანამშრომლების მიერ.

საია მოუწოდებს შინაგან საქმეთა სამინისტროს, მიიღოს ყველა შესაძლო კანონიერი ზომა, რათა თავიდან იქნეს აცილებული პოლიციელთა მხრიდან კანონდარღვევის ფაქტები, რაც კითხვის ნიშნის ქვეშ აყენებს სახელმწიფოს მხრიდან ადამიანის უფლებათა პატივისცემას და აკნინებს პოლიციის მიმართ საზოგადოების ნდობას;