ზუგდიდის მუნიციპალიტეტის გამგეობა, 2015 წლის 14 მარტს, კულტურის ცენტრ „ოდიში“–ს საკონცერტო დარბაზში, სადაც ფილმის - „9 წლიანი რეჟიმის სისხლიანი ქრონიკა“  ჩვენება გაიმართა, მოსწავლეების ყოფნის შესახებ განმარტებას აკეთებს. გამგეობა ფილმის ჩვენებაზე მოსწავლეების დასწრებას უარყოფს და კულტურის ცენტრში ბავშვების ყოფნას სხვა ღონისძიებას უკავშირებს. უწყების საზოგადოებასთან ურთიერთობის განყოფილება შესაბამის ფოტოებსაც ავრცელებს. რადიო "ათინათი" გამგეობის განცხადებას უცვლელად გთავაზობთ: "ზუგდიდის მუნიციპალიტეტის გამგეობა სრული პასუხისმგებლობით აცხადებს რომ, ფილმის ჩვენებაზე არასრულწლოვანი ბავშვები და სკოლის მოსწავლეები დარბაზში არ იმყოფებოდნენ და კატეგორიულად უარყოფს გავრცელებულ ინფორმაციას, თითქოს აღნიშნული ფილმის ჩვენება ზუგდიდის მუნიციპალიტეტის გამგეობის მიერ იყო ორგანიზებული.  ფილმის ჩვენება არასამთავრობო ორგანიზაცია „ყველა თაობა საქართველოსთვის“ ეგიდით მოხდა. ტელეკომპანია  „რუსთავი 2“–სა და სხვა მედია საშუალებებში გაჟღერებულ ინფორმაციას, თითქოს ფილმის ჩვენებას მოსწავლეები ესწრებოდნენ მუნიციპალიტეტის გამგეობა დეზინფორმაციას უწოდებს. 2015 წლის 14 მარტს კულტურის ცენტ „ოდიში“–ს საკონცერტო დარბაზში დაგეგმილი იყო ფესტივალი ქორეოგრაფიული ანსამბელებისათვის, სადაც მონაწილეობას სამეგრელოს რეგიონის ქორეოგრაფიული სტუდიების მოსწავლეები იღებდნენ. ცენტრის ეზოსა და ფოიეში მათი ყოფნა მხოლოდ ამ ფაქტს უკავშირდება.  ზუგდიდის მუნიციპალიტეტის გამგეობა მსგავსი ცრუ და ყალბი კადრებისა და „საგანგებოდ დადგმული“ რეპორტაჟების გაშუქებისას, რომელიც ასახავს დეზინფორმაციას და იქნება ზუგდიდის მუნიციპალიტეტისათვის ღირსების შემლახავი, მსგავსი ფაქტის დაფიქისრებისას იტოვებს უფლებას ყველა მედია საშუალებას პასუხი სამართლებრივად აგებინოს",- ნათქვამია განცხადებაში.