ზუგდიდის მუნიციპალიტეტის საკრებულოს საზოგადოებასთან ურთიერთობის სამსახურის ხელმძღვანელი მაგდალინა თოდუა, რომელიც  პარალელურად პედაგოგიურ საქმიანობას ეწევა,ზუგდიდში 14 მარტს გამართულ შეხვედრასთან დაკავშირებით  განცხადებას ავრცელებს.  მაგდალინა თოდუა აცხადებს, რომ სკოლა აპოლიტიკური ორგანიზაციაა და ის, როგორც პედაგოგი, არ დაუშვებს სკოლისა და მოსწავლეების სახელით მანიპულირებას პოლიტიკურ თემებზე. რადიო"ათინათი"უცვლელად გთავაზობთ გავრცელებული განცხადების ტექსტს.

“რამდენიმე დღეა სხვადასხვა მედიასაშუალებებში ვრცელდება ინფორმაცია,რომ 2015 წლის 14 მარტს, კულტურის ცენტრ „ოდიშის“ საკონცერტო დარბაზში ფილმის „9 წლიანი რეჟიმის სისხლიანი ქრონიკის“ ჩვენებას მოსწავლეები ესწრებოდნენ.  სრული პასუხისმგებლობით ვაცხადებ, რომ ზუგდიდის მუნიციპალიტეტის ტერიტორიაზე არსებული საჯარო სკოლის მოსწავლეები ფილმის ჩვენებაზე არ იმყოფებოდნენ.  2015 წლის 14 მარტს კულტურის ცენტ „ოდიშის“ საკონცერტო დარბაზში დაგეგმილი იყო ფესტივალი ქორეოგრაფიული ანსამბლებისათვის, სადაც მონაწილეობას სამეგრელოს რეგიონის ქორეოგრაფიული სტუდიების მოსწავლეები იღებდნენ. ცენტრის ეზოსა და ფოიეში მათი ყოფნა მხოლოდ ამ ფაქტს უკავშირდება.

პირადად მე, ორგანიზატორებთან და დარბაზის ადმინისტრაციასთან ერთად, ვაკონტროლებდი შესასვლელს. ჩემთვის შეურაცხმყოფელია, ის ფაქტი, რომ მანიპულირებენ ჩემი პედაგოგობით.  დიახ, მე ვარ პედაგოგი და კარგად მაქვს გაცნობიერებული, რომ სკოლა აპოლიტიკური ორგანიზაციაა, მის დაქვემდებარებაში შემავალი ყველა საჯარო უწყებისთვის სკოლის პოლიტიზაციის ნებისმიერი გამოვლინება, პრინციპულად მიუღებელია. ეწინააღმდეგება ბავშვებისა და მოზარდების დაშვებას მათთვის შეუფერებელ, მძიმე შინაარსის ინფორმაციასთან.  შესაბამისად, როგორც მასწავლებელი, ვალდებული ვარ დავიცვა ბავშვის უფლებები, სკოლის შინაგანაწესი და კანონი,”- ნათქვამია მაგდალინა თოდუას  განცხადებაში.