Facebook -ის ტექნიკური დირექტორი დევიდ რეკორდონი, თეთრმა სახლმა ინფორმაციული ტექნოლოგიების დირექტორად დაიქირავა. რეკორდონი პირადად იცნობს აშშ-ის პრეზიდენტს. ისინი გასული წლის აგვისტოში შეხვდნენ ერთმანეთს, როცა მონაწილეობას იღებდნენ აშშ-ის ციფრული სერვისის შექმნაში, რომლის მიზანია ტექნიკური ცოდნის მქონე ადამიანების შეკრება, რომლებიც გააუმჯობესებენ სამთავრობო საიტების მუშაობას. მაშინ რეკორდონმა პრეზიდენტის გაცნობის შესახებ შთაბეჭდილებებზე საჯაროდ დაწერა და თქვა, რომ საინტერესო გამოცდილება მიიღო. იგივე ჩანაწერში მან დაწერა, რომ არ აპირებს საჯარო სამსახურში გადასვლას. Facebook-ის ყოფილი თანამშრომლის თეთრ სახლში გადასვლაზე კომენტარი გააკეთა აშშ-ის პრეზიდენტმაც და თქვა, რომ რეკორდონის მიერ კერძო სექტორში დაგროვილი გამოცდილება, ძალიან სასარგებლო იქნება ადმინისტრაციის მუშაობისთვის საზოგადოების სასიკეთოდ. მსხვილი IT-კომპანიის ყოფილი თანამშრომლის დაქირავება თეთრი სახლისთვის პირველი არ არის. Google-ის მთავარი იურისტის ყოფილი მოადგილე მიშელ ლი, აშშ-ის საპატენტო სამსახურს ჩაუდგა სათავეში, ხოლო Google-ის ყოფილი ვიცე-პრეზიდენტი მეგან სმიტი კი პრეზიდენტის ადმინისტრაციაში ტექნოლოგიების დირექტორის პოსტზე დაინიშნა.