26 მარტს, ქართველმა მწერალმა გურამ დოჩანაშვილმა 76 წლის იუბილე ზუგდიდში აღნიშნა. ქართველი კლასიკოსი მწერლისადმი მიძღვნილი საღამო ზუგდიდის კულტურის ცენტრ „ოდიშის“ საკონცერტო დარბაზში გაიმართა. სცენაზე ასულმა მწერალმა ზუგდიდელ მკითხველს თბილი მასპინძლობისათვის მადლობა გადაუხადა და გაანდო, რომ იგი ახალ ნაწარმოებზე მუშაობას უახლოეს მომავალში დაასრულებს. ღონისძიების დასასრულს ქართველ მწერალს ზუგდიდისა და ცაიშის მიტროპოლიტ გერასიმეს ლოცვა-კურთხევით ყოვლადწმინდა ღვთისმშობლის პატიოსანი სამოსელის ხატი, ქალაქ ზუგდიდის მუნიციპალიტეტისგან მხატვარ ელენე ფიფიას ნამუშევარი "საქართველო" და სამეგრელო-ზემო სვანეთის სამხარეო ადმინისტრაციის სახელით მაღალპოლიგრაფიული გამოცემა “დადიანები” საჩუქრად გადაეცა. მწერლის ცნობილი ნაწარმოებია: „სამოსელი პირველი“, „კაცი,რომელსაც ლიტერატურა ძლიერ უყვარდა“, „იგი სიყვარულისთვის იყო გაჩენილი, ანუ გრიშა და მთავარი“, „ერთი რამის სიყვარული, დაფარვა რომ სჭირდება, ანუ მესამე ძმა კეჟერაძე“ და სხვა. გურამ დოჩანაშვილი ლიტერატურული პრემია „საბას“ ლაურეატია ლიტერატურის განვითარებაში შეტანილი განსაკუთრებული წვლილისთვის. ქართველი მწერალი გურამ დოჩანაშვილი 1939 წლის 26 მარტს თბილისში დაიბადა.