საქართველოს პრემიერ -მინისტრმა ზუგდიდში სოფლის მეურნეობის სამინისტროს სურსათის უვნებლობის ეროვნული სააგენტოს ახალი ოფისი გახსნა. თანამედროვე სტანდარტების,უახლესი ტექნიკით აღჭურვილი ოფისის გახსნას სოფლის მეურნეობის მინისტრი ოთარ დანელია,სურსათის ეროვნული სააგენტოს უფროსი ზაზა დოლიძე და ადგილობრივი ხელისუფლების წარმომადგენლები ესწრებოდნენ. რეგიონულ სამმართველოში სულ 35 ადამიანია დასაქმებული, სურსათის ეროვნული სააგენტოს ახალ ოფისში კი 12 ადგილობრივი დასაქმდება. „ჩვენ გვინდა, რომ ეს რეგიონი გახდეს სამაგალითო, სამეგრელოში არის უზარმაზარი პოტენციალი, როგორც ბუნებრივი, ისე ადამიანური რესურსი, რომელსაც სჭირდება ეფექტიანი გამოყენება. გასულ წელს ჩვენი ძალისხმევითა და ბიზნესის დახმარებით რამდენიმე ათეული მილიონი ლარის ინვესტიცია შემოვიდა სამეგრელოში. წელს ველოდებით უფრო მეტს. დღეს გავხსენით სურსათის უვნებლობის რეგიონული ოფისი, ასევე დღეს ვიყავი თხილის გადამამუშავებელ ახალ საწარმოში, სადაც ახალგაზრდა მეწარმეები არიან. მათ მიიღეს დაფინანსება სახელმწიფოსგან 700 თასი ლარის ოდენობის. ეს არის ძალიან ხელშესახები მაგალითები, რომელიც განვახორციელეთ ბიზნესსექტორთან ერთად. ყველაფერი გეგმის მიხედვით ვითარდება და გავაკეთებთ ყველაფერს, რათა მაქსიმალურად შევუწყოთ ხელი მეწარმეობის განვითარებას რეგიონში,“–განაცხადა ირაკლი ღარიბაშვილმა ჟურნალისტებთან საუბრისას. რეგიონული სამსახური უზრუნველყოფს მავნე სურსათის გამოვლენა-განადგურებას და ცხოველთა ჯანმრთელობის დაცვას მავნე ორგანიზმებისგან.  ახალი შენობა ზუგდიდში აგრარული სექტორის ყოვლისმომცველი განვითარების ფონდის დაფინანსებით აშენდა.