ლეონარდო დი კაპრიომ, რომელმაც 2014 წელს ფილმში „უოლ-სტრიტის მგელი“ შესრულებული მთავარი როლისათვის 25 მლნ დოლარი მიიღო, გადაწყვიტა თავისი აურაცხელი სიმდიდრე სხვა საშუალებით კიდევ უფრო გაზარდოს. მსახიობი მალიბუზე,„მილიარდერების სანაპიროზე“ სახლს აქირავებს. მსურველებს სახლის დაქირავება თვეში 23 ათას დოლარად შეუძლიათ, მთელი ზაფხულით კი - 50 ათას დოლარად. ამის შესახებ Forbes-ი იუწყება. სანაპიროს ოფიციალური სახელწოდებაა „კარბონ ბიჩი“, თუმცა ის უფრო მეტად ცნობილია როგორც მილიარდერებისა და ცნობილი ადამიანების ადგილი. გამოცემა აღნიშნავს, რომ დი კაპრიო, რომელიც ცოტა ხნის წინ ახალ გოგონასთან ერთად დაინახეს, ვერასდროს იფიქრებდა, რომ სახლი, რომელიც 1998 წელს 1,6 მლნ დოლარად შეიძინა, 17 წლის შემდეგ 15 მლნ დოლარი ეღირებოდა. ლეოს სახლი დიდი არ არის. მასში განთავსებულია სამი საძინებელი, ორი სააბაზანო, ფართო სასტუმრო ოთახი მდიდრული პარკეტის იატაკით, სპა-ცენტრი და ბარბექიუს მოედანი. თუ სად გაატარებს თავად მსახიობი ზაფხულს, უცნობია. 2013 წელს მან მალიბუში მდებარე თავისი უზარმაზარი სახლი 17,350 მლნ დოლარად გაყიდა.