საფრანგეთის ეროვნულმა ასამბლეამ დაამტკიცა კანონპროექტი, რომელიც სამოდელო სააგენტოების მიერ ზედმეტად გამხდარი მოდელების აყვანას კრძალავს. როგორც BBS-ი იუწყება, საკანონმდებლო ინიციატივით პარლამენტის ქვედა პალატას საფრანგეთის ჯანდაცვის სამინისტრომ ცოტა ხნის წინ მიმართა. ამიერიდან სამოდელო სააგენტოებმა უნდა შეამოწმონ გოგონების წონისა და სიმაღლის თანაფარდობა, რათა დარწმუნდნენ, რომ მოდელის სხეულის მასის ინდექსი დადგენილ ნიშნულზე დაბალი არ არის. კანონის დარღვევისთვის სამოდელო სააგენტოებს ექვსთვიანი პატიმრობა და 75 000 -ევროს მოცულობის ჯარიმის გადახდა ემუქრებათ. სამოდელო სააგენტოების ეროვნული კავშირის წევრების აზრით, მსგავსი ზომები სამოდელო ბიზნესს დიდ ზიანს მიაყენებს. უნდა ითქვს, რომ მსგავსი კანონები მოქმედებს ესპანეთში, იტალიაში, ბელგიაში, ჩილესა და ისრაელში. უნდა აღინიშნოს, რომ საფრანგეთი ასევე აპირებს იმ საიტების აკრძალვას, რომლებიც ზედმეტი სიგამხდრისა და ანორექსიის პროპაგანდას ეწევიან. პარიზის სამოდელო სააგენტოს ხელმძღვანელის მარი ჟერალდის თქმით, არ შეიძლება ანორექსიისა და ბუნებრივი სიგამხდრის ერთმანეთში არევა. მისივე თქმით, არსებობენ გოგონები, რომლებიც უხვი საკვების მიღების მიუხედავად წონაში არ იმატებენ.