ზუგდიდი-თბილისის მიმართულებით მოძრავი დღის ჩქაროსნული მატარებლის შემადგენლობის შეცვლა დროებითია. ამის შესახებ რადიო „ათინათს“ ”საქართველოს რკინიგზის“ საზოგადოებასთან ურთიერთობის სამსახურის უფროსმა დაჩი ცაგურიამ განუცხადა. ცაგურიას განმარტებით, აღნიშნულ მატარებელს სარემონტო სამუშაოები უტარდება და ის ჩვეულ რეჟიმს ზაფხულის დასაწყისში დაუბრუნდება. „ჩვენ ზუგდიდის მიმართულებით სრულიად ახლადგარემონტებული მატარებელი დავნიშნეთ. ზაფხულის სეზონისთვის ველოდებით მგზავრთა ნაკადის საგრძნობლად გაზრდას და ამ მოთხოვნას, რომ ვუპასუხოთ - ვემზადებით“, - თქვა დაჩი ცაგურიამ. დღეს ქალაქ ზუგდიდის მუნიციპალიტეტის საკრებულოს სხდომაზე დეპუტატმა „ნაციონალური მოძრაობიდან“ ლევან კონჯარიამ განაცხადა, რომ ზუგდიდი-თბილისის მიმართულებით მოძრავი დღის ჩქაროსნული მატარებლის შემადგენლობა შეიცვალა. მან ასევე განმარტა, რომ აღნიშნული მატარებელი ბათუმს გადაეცა.